O Nodo de Ciberseguridade fomenta o hábito da protección en liña cun concurso para escolares
venres, 22 de outubro do 2021
O
Nodo de Ciberseguridade de Galicia, promovido pola axencia autonómica
AMTEGA vén de convocar un concurso dirixido ao alumnado de 5º e 6º
de Primaria e 1º e 2º da ESO co obxectivo de “concienciar as
persoas menores sobre os riscos aos se enfrontan no uso de
tecnoloxías dixitais”.
Sobre
os porqués desta iniciativa, AMTEGA lembra que o problema dos
ciberdelitos é un problema en auxe que adquiriu aínda máis
presenza coa chegada da pandemia, polo que cómpre que poñamos en
xogo recursos para incrementar a nosa protección dixital, facendo
fincapé nas novas xeracións.
A
axencia recorda que Galicia sitúase na sétima posición das
autonomías mais afectadas polos ciberdelitos, e A Coruña e
Pontevedra están entre as vinte provincias nacionais onde mais
feitos cibercriminais se denunciaron. Amais, apunta a entidade
autonómica, “o perfil das vítimas non deixa de lado aos menores
de idade, e de feito estímase que un total de 3.427 ciberdelitos
foron dirixidos a este colectivo en España”. Os delitos sexuais a
través do uso das tecnoloxías dixitais e as ameazas e coaccións
son os grupos penais que encabezan a tipoloxía de ciberdelitos
denunciados dirixidos aos menores.
Para
afrontar esta situación, a Xunta de Galicia promoveu a creación do
nodo galego de ciberseguridade CIBER.gal, estrutura de colaboración
público-privada en materia de ciberseguridade fundada pola Xunta de
Galicia a través da Axencia para a Modernización Tecnolóxica de
Galicia (AMTEGA), as catro deputacións galegas, a FEGAMP, o
Instituto Nacional de Ciberseguridade (INCIBE) e o Centro
Criptolóxico Nacional (CCN). Un dos obxectivos fundamentais deste
nodo é “concienciar sobre a importancia da ciberseguridade, motivo
polo que organiza o Encontro Galego de Ciberseguridade CIBER.gal os
días 10 e 11 de novembro de 2021 na Cidade da Cultura de Santiago de
Compostela”.
Neste
encontro, ademais doutras actividades destinadas tanto ao tecido
empresarial como á cidadanía e á administración pública que se
poden consultar no programa, celébrase o Concurso Ciberseguridade
no cole!, co obxectivo principal de “sensibilizar ao alumnado
sobre os riscos aos que se enfrontan cando empregan os medios
dixitais”. Esta iniciativa foi promovida por Telefónica no marco
deste encontro. O concurso conta cunha fase clasificatoria en liña
e unha final presencial, e para participar é preciso inscribirse
neste formulario antes o 29 de outubro ás 12:00h.