O PSdG solicita a maior das atencións para previr a violencia de xénero dixital
martes, 23 de novembro do 2021
Co
gallo das celebracións do 25-N, Día Internacional contra a
Violencia de Xénero, os socialistas galegos presentaron unha
proposta para achegar “a maior das atencións” á prevención e
sensibilización das agresións de xénero dixital, “especialmente
entre adolescentes”. Fíxoo este martes 23 de novembro a voceira do
PSdG-PSOE Noa Díaz, durante o debate do ditame da reforma da lei
galega para a prevención e o tratamento integral da violencia de
xénero que coincide no mes de novembro, “tristemente dedicado á
violencia machista”.
Sobre
o novo texto lexislativo aprobado tralo debate por unanimidade no
Parlamento de Galicia, o Grupo Socialista realizou 5 emendas, das que
4 foron aprobadas, para instar ao Goberno a “pór o foco na
educación, investigación e en mecanismos de control sobre este tipo
de violencia”.
Así,
no eido da investigación, o PSdeG introduciu no articulado “que se
potencie a investigación sobre a violencia dixital, tendo en conta
que é algo moi novo e que desgraciadamente viu para quedar”.
En
canto ao ámbito educativo, o Grupo Socialista engadiu ao texto a
“importancia” de impulsar actividades dirixidas á comunidade
escolar para a prevención deste tipo de comportamentos, así como da
realización de campañas de sensibilización e formación da
poboación xuvenil.
Por
último, a dirixente socialista aplaudiu que se incluíse tamén na
lei a proposta socialista para que o Goberno galego “impulse coas
principais plataformas intermediarias de Internet, acordos de
colaboración co fin de establecer criterios e mecanismos áxiles e
urxentes de denuncia e retirada de contidos relacionados coa valencia
de xénero dixital”.