O Parallelware Analyzer de Appentra, tecnoloxía emerxente na SC18 de Texas
mércores, 31 de outubro do 2018
Appentra
Solutions, a spin-off participada pola Universidade da
Coruña e promovida por investigadores vinculados ao o Centro de
Investigación TIC (CITIC), vén de obter un importante recoñecemento
ao seu labor. Máis en detalle, o seu novo produto, Parallelware
Analyzer,
foi seleccionado como
Tecnoloxía Emerxente na SC18 en Texas, que pasa por ser a
conferencia máis importante sobre Computación de Alto Rendemento
(High Performance Computing).
Como lembraremos, Appentra está especializada en
achegar ferramentas de software de alta calidade que permiten un uso
extensivo das técnicas de computación de HPC en todas as áreas de
enxeñería, ciencia e industria. Entre os seus principais clientes
áchanse empresas e organizacións que executan aplicacións
informáticas de cómputo intensivo, con uso frecuente en mercados
como o aeroespacial, o automóbil, a enxeñería civil, a biomedicina
ou a química.
Segundo informa Appentra, na cita SC18 a empresa
galega será unha das sete organizacións seleccionadas para
participar na sección Emerging Technologies Showcase. A firma
tamén lembra que a SC18 é a principal conferencia internacional de
computación de alto rendemento, redes, almacenamento e análise,
centrándose a devandita sección en mostrar solucións innovadoras e
salientábeis da industria, de laboratorios gobernamentais e
academias, con potencial para “mellorar de maneira significativa e
ampliar o mundo do HPC nos vindeiros anos”.
O produto novo de Appentra, que se lanzará na
SC18, foi elixido polas súas posibilidades para acelerar o proceso
de paralelaxe de código. A ferramenta de informes de liña de
comandos, Analyzer, desenvolveuse sobre a base da tecnoloxía
Parallelware Core de Appentra, pero, segundo informa a spin-off
da UDC, está deseñada para satisfacer as necesidades do programador
experto en HPC.
Analyzer, de feito, axuda ao desenvolvedor de
código de cálculo de alto rendemento a recompilar información
sobre o código fonte en todo, desde os tipos de computación até as
perspectivas da memoria e o fluxo de control, o que “contribúe a
minimizar o tempo preciso para comprender como e onde paralizar o
código e que outras oportunidades de paralelaxe de código fican
pendentes”, explican dende Appentra.