O Pixel Watch 4 pode pedir axuda por satélite

O Pixel Watch 4 preséntase como a maior actualización ata o momento da gama, cunha batería de longa duración, a nova pantalla curva Actua 360, soporte pioneiro para comunicación satélite independente e Gemini para acceder ao asistente de IA en calquera lugar.
O reloxo redeseñouse mantendo a súa forma circular característica. A pantalla Actua 360, curvada fisicamente, ofrece un 10 % máis de superficie activa e un aspecto sen marcos grazas a uns bordos un 16 % máis pequenos, ao tempo que resulta máis visible á luz directa do sol grazas a un brillo máximo de 3000 nits, un 50 % superior á xeración anterior. A interface Material 3 Expressive engade dinamismo e personalización con cores máis intensas, esferas vistosas e información de lectura rápida, reforzada cun motor háptico un 15 % máis potente e cun altofalante mellorado que fai máis agradable a interacción con Gemini.
No apartado da autonomía, o Pixel Watch 4 ofrece un 25 % máis de duración, chegando ás 30 horas no modelo de 41 mm e ás 40 horas no de 45 mm, ampliables ata dous ou tres días en modo aforro. A nova base de carga rápida permite recuperar o 50 % da batería en só quince minutos. A potencia está garantida pola plataforma Snapdragon W5 Gen 2 Wearable, xunto cun coprocesador con aprendizaxe automática de nova xeración que é un 25 % máis rápido consumindo a metade de enerxía. O deseño tamén destaca pola súa resistencia, grazas á protección Corning Gorilla Glass e ao aluminio de grao aeroespacial, sendo estanco ata 50 metros e, por primeira vez, reparable (poden substituírse tanto a batería como a pantalla).
O Pixel Watch 4 LTE convértese tamén no primeiro smartwatch con comunicación satélite de emerxencia independente, capaz de conectar cos servizos de rescate a través de satélites xeostacionarios e enviar a localización mesmo en zonas sen cobertura móbil.
No ámbito da saúde e o deporte, o reloxo incorpora o seguimento do sono máis preciso ata agora, cunha mellora do 18 % na clasificación dos ciclos completos. O novo sensor de temperatura cutánea permite detectar variacións fóra do rango persoal e anticipar cambios no estado de saúde. O GPS de dobre frecuencia garante rutas máis exactas, tanto en contornas urbanas como en percorridos entre árbores, mentres que para os ciclistas agora é posible consultar estatísticas en tempo real na aplicación Fitbit desde o guiador. Engádense ademais novas modalidades deportivas, como pickleball ou baloncesto, e a detección automática de actividade con intelixencia artificial asegura que cada adestramento quede rexistrado, mesmo se o usuario esquece activalo manualmente. Todo isto compleméntase co ecosistema Fitbit, que inclúe ferramentas avanzadas de control do estrés, electrocardiograma, paneis de métricas e informes diarios de saúde.
Unha das innovacións máis destacables é a incorporación dun adestrador persoal con intelixencia artificial, desenvolvido con Gemini. Este sistema ofrece orientacións proactivas e personalizadas de sono e fitness, adaptadas aos obxectivos e ás circunstancias reais de cada usuario, converténdose nun adestrador dispoñible as 24 horas directamente no pulso. O servizo iniciarase en fase de probas nos Estados Unidos en outubro, accesible tanto en dispositivos Fitbit como no Pixel Watch, a través dunha aplicación Fitbit completamente renovada.
Tamén no apartado da conectividade, o Pixel Watch 4 aproveita a intelixencia artificial no propio dispositivo para mellorar a comunicación. As respostas rápidas ofrecen mensaxes contextuais automáticas, mentres que Gemini pódese activar simplemente levantando a boneca, permitindo obter información ou executar tarefas sen precisar das mans.
O reloxo xa está dispoñible en reserva e chegará ás tendas o 9 de outubro, cun prezo de 399 euros na versión Wi-Fi e 499 euros na LTE para o modelo de 41 mm, e 50 euros máis no caso do modelo de 45 mm.