O Polo Aeroespacial de Galicia recibiu dez candidaturas de empresas que aspiran a ser socias estratéxicas
luns, 13 de setembro do 2021
O
conselleiro de Economía, Francisco Conde, participou este luns na
clausura en Vigo do cuarto Congreso Internacional Aeronáutico e
Espacial (CIAG), organizado polo Consorcio Aeronáutico Galego. Conde
aproveitou a ocasión para facer un repaso dos froitos acadados (e
por acadar) a través do Polo Aeroespacial de Galicia, impulsado pola
Axencia Galega de Innovación (Consellería de Economía). Respecto
do futuro do proxecto, dixo que o Polo xa recibiu un total de dez
propostas de entidades para ser novas socias estratéxicas do mesmo.
O
titular de Economía engadiu que o lanzamento da convocatoria para
seleccionar “novas empresas tractoras” que acompañen á Xunta
neste proxecto pioneiro é unha das 30 actuacións contempladas na
nova Estratexia 2021-2025 do Polo Aeroespacial, cun orzamento de 40M€
e a previsión de asinar entre catro e oito acordos de asociación
para desenvolver arredor de 80 proxectos de I+D.
No
que atinxe ás dez propostas presentadas, o conselleiro dixo que
estas “entrarán agora en fase de avaliación unha vez se comprobe
que a documentación achegada se axusta ás bases reguladoras da
convocatoria”. Amais, puxo o foco no interese que esperta o
proxecto entre a industria aeronáutica, “un proxecto co que se
levan mobilizado 164M€ a partir dun investimento público de 58M€”
e que conta cunha nova folla de ruta de cara ao 2025 e cun
investimento de 70 millóns de euros “para consolidar maior pegada
industrial, para que as pemes galegas se incorporen ás cadeas de
valor das grandes empresas do sector, para impulsar a proxección
internacional e a comercialización de novas solución e para a
creación de emprego cualificado”.