O Portal da Lingua, principal recurso informativo das probas CELGA que culminan a segunda convocatoria

A Xunta de Galicia, a través da Secretaría Xeral de Política Lingüística, inicia esta fin de semana a segunda e última convocatoria de exames CELGA deste 2021. En total, están inscritas case 1.600 persoas candidatas para a obtención dos CELGA 4, 3 e 2, que se suman aos 1.987 que participaron na primeira rolda de exames, a máis completa, que tivo lugar entre os meses de maio e xuño entre Santiago de Compostela e Ponferrada. Novamente todo o que precisamos sobre estas probas está dispoñíbel no Portal da Lingua.
Os exames este 20 de novembro coas probas do CELGA 4 no IES compostelán Antonio Fraguas e na Escola Oficial de Idiomas de Ponferrada, sedes oficiais nas que están convocadas un total DE 986 persoas, 789 en Santiago e 197 na vila leonesa. Para cumprir coa repartición requirida polas medidas de seguridade sanitarias, os candidatos estarán repartidos entre os dous días, de xeito que o sábado examinaranse as persoas cuxo primeiro apelido comece por unha letra entre o Y e o L e o domingo será a quenda dos restantes aspirantes, que van das letras M ao X.
As probas rematarán a seguinte fin de semana en ambas as sedes cos exames do CELGA 3 o sábado 27, con 374 persoas admitidas (315 en Santiago e 59 en Ponferrada), e do CELGA 2 o domingo 28, cun total de 239 aspirantes matriculados (210 en Santiago e 29 en Ponferrada). As probas do CELGA 1, que unicamente se realizan en Santiago, non están convocadas nesta volta.
Como dixemos, toda a información relativa ás portas de entrada e ás aulas asignadas está dispoñíbel no Portal da Lingua Galega, onde tamén se irán actualizando durante o desenvolvemento dos exames as quendas das probas orais e os horarios nos que deben presentarse as persoas convocadas. Ademais, todos os interesados en presentarse a unha próxima convocatoria e/ou preparar as probas teñen toda a información e o material de formación e autoformación no dito portal.