O Porto e a Universidade de Vigo queren fortalecer o sector do mar con novas tecnoloxías
martes, 17 de abril do 2018
Levar as novas tecnoloxías e as súas vantaxes ao
ámbito do mar, e facelo con todas as consecuencias, procurando que o
sector da pesca sexa máis rendíbel, sustentábel e eficiente grazas
ao afianzamento no seu seo da Industria 4.0. Este
é o gran obxectivo do proxecto presentando onte pola Autoridade
Portuaria de Vigo, unha iniciativa de formación para as/os
profesionais do mar que abrangue obradoiros de capacitación e
actualización ante os importantes cambios sociais, ambientais,
tecnolóxicos e industriais que se aveciñan. Nesta iniciativa, o
Porto de Vigo conta co apoio da Dirección Xeral de Desenvolvemento
Pesqueiro, o Campus do Mar (UVigo), Campus de Excelencia
Internacional del Mar (Andalucía) e a Autoridade Portuaria de
Huelva, xa que as accións se dirixirán a ambas comunidades
autónomas. A idea, segundo fixeron saber estas entidades, é apostar
polas novas ferramentas para ser máis competitivos.
Na presentación oficial participaron o presidente
da APV, Enrique López Veiga; o reitor da Universidade de Vigo,
Salustiano Mato; a directora xeral de Desenvolvemento Pesqueiro da
Xunta, Susana Rodríguez, e a directora da Autoridade Portuaria,
Beatriz Colunga. O responsábel do Porto explicou que a finalidade
desta iniciativa é dar resposta ás “principais necesidades"
trasladadas polos axentes, principalmente referidas ás Industria 4.0
e as TIC. E engadiu: “Buscamos proporcionar unha oferta formativa
de calidade para actualizar os coñecementos do persoal, porque
debemos asumir que temos que perder prácticas antigas que xa non se
axustan á comercialización moderna”.
O reitor da Universidade, Salustiano Mato, apuntou
á formación como “a mellor forma de visualizar que a perda dos
traballos que coñecemos pola incidencia das novas tecnoloxías nos
anima a ser capaces de anticipar os traballos que veñen”. Mato
destacou tamén a importancia da alianza entre o Campus do Mar e o
Porto de Vigo que permitiu crear “un ecosistema de innovación que
achega contido á estratexia de crecemento azul que abriu un camiño
con grandes posibilidades para fabricar futuro”.
Segundo engadiron, as accións formativas serán
de balde e desenvolveranse ao longo de 2018 e grazas a elas máis de
165 persoas recibirán formación especializada e máis de 250
asesoramento específico. O programa enfocarase a unha tripla
perspectiva: por unha banda, promover a cualificación profesional;
por outra, xerar emprego de calidade e unha terceira, potenciar a
competitividade da economía marítimo-portuaria dende a
sustentabilidade social e ambiental.
O
primeiro curso, centrado na Industria 4.0, arrancará o vindeiro
2 de maio e está dirixido a persoal directivo e mandos intermedios
con competencias para a toma de decisións e ligados ao sector
portuario e pesqueiro. A docencia estenderase ao longo dos meses de
maio e xuño co obxectivo de dotar ás persoas participantes de
coñecementos, habilidades e ferramentas prácticas baseadas na
incorporación das novas tecnoloxías, para a adaptación dos
procesos industriais e operativos aos cambios tecnolóxicos,
ambientais e normativos. O prazo de inscrición no curso está
aberto, o número de prazas é limitado e a matrícula, de balde.