O Proxecto Nós mobiliza recursos lingüísticos, libres e intelixentes a prol do galego

Co novo ano, o portal Mancomún fixo un balance do acadado ata o de agora polo Proxecto Nós, iniciativa impulsada para incrementar a presenza do galego no panorama actual da Intelixencia Artificial, posta en marcha pola Consellería de Educación, a Secretaría Xeral de Política Lingüística e a Universidade de Santiago. Nós, lembra Mancomún, é un proxecto colaborativo que permitirá xerar os recursos dixitais e lingüísticos precisos para facilitar o desenvolvemento de aplicacións baseadas en Intelixencia Artificial (IA) e Tecnoloxías da Linguaxe (TL) tales como asistentes de voz, tradutores automáticos e axentes conversacionais en lingua galega. Destaca tamén pola súa vontade de achegar recursos libres, lingüísticos e dixitais.
No balance tamén se recorda que o obxectivo central do proxecto “é promover a presenza dixital do galego, garantindo que a nosa lingua non fique excluída dos novos desenvolvementos TIC, mediante a creación dunha ampla variedade de ferramentas e recursos de alta calidade que serán postos, de xeito gratuíto e con licenzas libres, a disposición de calquera institución, organización ou empresa que queira desenvolver un produto tecnolóxico, aplicación ou servizo que incorpore o galego”.
O Proxecto Nós é un proxecto da Xunta de Galicia cuxa execución foi encomendada á Universidade de Santiago de Compostela, a través de dúas entidades de investigación en Intelixencia Artificial e Tecnoloxías da linguaxe: o ILG (Instituto da Lingua Galega) e o CiTIUS (Centro Singular de Investigación en Tecnoloxías Intelixentes).
Características do proxecto Nós
O equipo investigador está a traballar nos subproxectos de que consta Nós, e que se corresponden con algunhas das grandes tarefas do Procesamento da Linguaxe Natural:
– Síntese de voz
– Recoñecemento da fala
– Sistemas de diálogo
– Corrección e avaliación lingüística automáticas
– Tradución automática
– Xeración automática de textos
– Extracción de información
– Verificación de información e minaría de opinións
En Mancomún valórase moi positivamente a adopción dentro do Proxecto Nós de licenzas libres, o que permitirá que recursos, ferramentas e ata casos de uso poidan ser mantidos pola comunidade de software libre e tamén polas empresas, “o que fará posible, tamén, que a comunidade galego-falante e galego-escribente poida realizar a súa vida diaria na sociedade dixital do século XXI”.
Recursos do proxecto
Parte destes recursos xa foron recopilados e publicados na web do proxecto.
En Mancomún destácase que un dos máis recentes e destacados foi AgasallaNós, cuxa campaña está a día de hoxe en marcha. O obxectivo de AgasallaNós é recoller voces a través de voluntarios, para enriquecer o recoñecemento de voz en galego. A iniciativa pretende rexistrar diferentes variedades fonéticas do galego para que as aplicacións baseadas no recoñecemento da fala sexan quen de identificar toda a riqueza da nosa lingua.
O obxectivo é recompilar máis de 1.000 horas de gravacións que representen diferentes idades, xéneros e variedades dialectais.
As colaboracións, que comezaron os días pasados no Concello de Porto do Son, cunha xeira de traballo na que participaron o alcalde Luis Oujo, ou o patrón maior da Confraría de Portosín, Isaac Gaciño, poden facerse a través da web doagalego.nos.gal, que emprega a plataforma doutro gran proxecto colaborativo como é Common Voice da Fundación Mozilla.