O Samsung Galaxy Note II supera os 3 millóns de terminais vendidos

No mes de setembro Samsung lanzou en Corea do Sur o seu móbil Galaxy Note II (que chegou a España en outubro), repetindo a súa aposta polos terminais que alcuman phablets ou tabletófonos, polo que tamaño de pantalla que os deixa a medio camiño entre smartphones e tablets, e parece que están a acertar cun importante nicho de mercado, como confirman as cifras de vendas, pois veñen de anunciar que este móbil con pantalla de 5,6 polgadas que conta coa posibilidade de empregar a súa pantalla táctil cunha stylus vendeu xa 3 millóns de unidades a nivel mundial, volume que pode parecer cativo se o comparamos incluso coa primeira fin de semana do iPhone 5, pero que para un produto que non vai dirixido para todo o público é un éxito innegable.
De feito, que Samsung estea a apostar por móbiles con pantallas de grande tamaño está permitíndolle chegar a un público ao que Apple non satisfai co seu catálogo de móbiles tan limitado, e como á vez non abandona os terminais de gama media e baixa fai que a compañía surcoreana estea a vender actualmente o dobre de móbiles que Apple, o que é un logro admirable nun momento no que outros grandes fabricantes de telefonía como Nokia, Motorola, RIM ou HTC están a pasar dificultades.