O Samsung Galaxy Z Fold2 custará 2.009 euros

martes, 1 de setembro do 2020 Marcus Fernández

JPEG - 33.5 KB
O Galaxy Z Fold2 pode adquirirse con visagras de cores personalizadas

Durante a presentación do Samsung Galaxy Note20 adiantaron o que sería o Samsung Galaxy Z Fold2, smartphone sucesor directo do Galaxy Fold orixinal que hoxe presentouse oficialmente, chegando incluso a abrirse o seu proceso de venda anticipada a un prezo de 2.009 euros, co que inclúen un seguro Samsung Care+ durante 1 ano, para protexer o dispositivo (cubre 1 accidente durante o período de cobertura da póliza) e gozar tamén dun servizo de atención telefónica personalizada cun equipo técnico de expertos. Como data de lanzamento dos dispositivo fixan o 18 de setembro (aínda que hai establecementos que prevén recibir unidades o vindeiro día 14).
O Samsung Galaxy Z Fold2 incorpora numerosas melloras con respecto ao primeiro Fold, sendo a máis importante o incremento de tamaño da súa pantalla externa, que ao ser agora unha pantalla Super AMOLED de 6,2 polgadas cunha resolución de 2.260 x 816 píxeles permite un uso efectivo do terminal encartado, mentres que a pantalla principal Dynamic AMOLED 2X de 7,6 polgadas ten unha resolución de 2.208 x 1.768 píxeles que, ao ser encartable pode operar incluso como dúas pantallas á vez grazas ao novo deseño de bisagra que facilita o uso do dispositivo coa pantalla aberta en distintos ángulos (modo Flex), co que pode empregarse de xeitos análogos a un ordenador portátil sobre unha mesa, o que resulta práctico para consumir contidos mentres se realiza outra acción, para videoconferencias con Google Duo en mans libres ou simplemente para gozar de interfaces de control avanzadas en aplicacións fotográficas.
Aínda que o primeiro Fold estaba moi orientado ao uso da súa pantalla principal, desta volta Samsung quixo aproveitar máis a pantalla externa, de xeito que cando esteamos disparando fotografías coa cámara traseira a pantalla externa tamén pode amosar o que se está a enfocar, o que pode resultar de grande utilidade, moi especialmente para poder realizar autorretratos de alta calidade, xa que empregaríase a cámara principal (con 3 sensores de 12 Mpíxeles e diferentes distancias focais) para estas instantáneas, en vez de as reducidas cámaras frontais (de 10 Mpíxeles e apertura f/2.2) que quedarían limitadas ao uso durante videoconferencias.
A pantalla principal está optimizada para a multitarefa, permitindo a súa división con até 3 fiestras activas, que no caso de aplicacións como o Microsoft Office incluso poderían aproveitarse para arrastrar e soltar contidos entre unha aplicación e outra, evitando así ter que recorrer a un ordenador persoal para editar unha presentación e permitindo fluxos de traballo que habitualmente estaban limitados a equipos informáticos. Outras aplicacións como Gmail, YouTube, Spotify ou Outlook están optimizadas para a pantalla do Fold2, presentando unha interface propia dunha aplicación para tabletas, ou sexa, aproveitando o xeneroso espazo de pantalla.
Este smartphone ten unha batería de 4.500 mAh con carga rápida tanto por cable como sen fíos, o que pode parecer pouco para un dispositivo con pantalla de grandes dimensións; e a nivel de conectividade inclúe dende WiFi 6 até 5G, soportando incluso bandas que tardarán bastante en estar operativas, polo que entendemos que é un dispositivo deseñado para ter bastante vida por diante. De feito, aínda que chega con Android 10, ten garantidos 3 actualizacións de xeración de Android. En España só está dispoñible nunha versión con 12 GB de RAM e 256 GB de almacenamento interno. Un produto que polo momento non quere chegar ao grande público, senón que busca ter certo aire de exclusividade, como denota o feito de que vaia contar tamén cunha edición de Thom Browne limitada a 5.000 unidades que chegará o 25 de setembro a un prezo de 3.300 dólares.

JPEG - 71.4 KB
Google Duo é unha das aplicación optimizadas para o modo Flex.
JPEG - 59.2 KB
Aínda que o Galaxy Z Fold2 está dispoñible en 2 cores distintas, o contar con bisagras personalizables conséguese que este dispositivo premium pareza máis especial.
JPEG - 60.5 KB
O modo Flex permite empregar o Galaxy Z Fold2 case en certas situacións coma se fose un ordenador portátil.
JPEG - 68.2 KB
Aplicacións de compañías como Google e Microsoft están optimizadas para o seu uso en grandes pantallas como a do Galaxy Z Fold2, na que se comportan coma se estivesen nunha tableta, aproveitando o espazo dispoñible para amosar máis información en pantalla.

Vídeo coa presentación oficial do Samsung Galaxy Z Fold2

PUBLICIDADE