O Samsung Galaxy Z Fold7 refina o seu deseño

Alexia Putellas estréase como embaixadora de Samsung con este lanzamento

Samsung presentou o novo Galaxy Z Fold7, un dispositivo encartable que combina deseño refinado, hardware de alto rendemento e integración avanzada de intelixencia artificial. Trátase do móbil máis delgado e lixeiro da serie, pensado para ofrecer unha experiencia completa tanto en mobilidade como en produtividade.
O Galaxy Z Fold7 destaca por un deseño que permite aproveitar unha pantalla máis ampla ao se despregar, sen renunciar á comodidade dun smartphone compacto cando está pechado. A integración da nova interface One UI 8, baseada en Android 16, permite sacar partido da IA en contextos máis visuais, interactivos e produtivos, especialmente deseñada para o seu formato encartable.

Máis fino, máis lixeiro, máis funcional

Con só 215 gramos de peso e un grosor de 8,9 mm ao estar pechado, o Galaxy Z Fold7 resulta doado de levar e manexar. Ao despregarse, ofrece unha pantalla principal Dynamic AMOLED 2X de 8 polgadas cun 11% máis de superficie que a da xeración anterior, mentres que a pantalla exterior acada as 6,5 polgadas cunha nova proporción de 21:9. Ambas as dúas contan cun brillo máximo de 2.600 nits e a tecnoloxía Vision Booster, que garante visibilidade incluso baixo luz solar directa.
A estrutura reforzada inclúe unha nova bisagra Armor FlexHinge máis delgada e resistente, unha cuberta de vidro Gorilla Glass Ceramic 2 e aluminio Advanced Armor no marco e na carcasa da bisagra. A capa de cristal ultrafino da pantalla principal tamén se reforzou cunha placa de titanio e un grosor un 50% maior, aumentando a durabilidade sen engadir volume.

Aposta pola IA e as cámaras

O Galaxy Z Fold7 incorpora o procesador Snapdragon 8 Elite for Galaxy, que ofrece un aumento notable do rendemento en tarefas de intelixencia artificial. Este chip garante unha experiencia fluída en funcións como tradución en tempo real, edición xerativa e outras tarefas baseadas en IA sen depender da nube.
A cámara principal de 200 Mpíxeles permite capturar imaxes con gran nivel de detalle e brillo, mesmo en condicións de pouca luz. Inclúe tamén unha cámara ultra grande angular de 10 Mpíxeles na pantalla principal e un novo motor de procesamento ProVisual Engine que mellora a calidade das fotos e vídeos de xeito automático.
Funcións como a edición xerativa, o borrado de elementos non desexados, o axuste de ángulos ou o enchido de fondos fan que a edición de contido sexa intuitiva e precisa. Tamén se incorpora unha nova versión do Borrador de audio, capaz de eliminar ruídos de fondo como vento ou tráfico con só un toque.
O sistema Galaxy AI está optimizado para a pantalla encartable e ofrece unha experiencia de uso natural e eficiente. Ferramentas como Gemini Live permiten facer preguntas contextuais por voz ou texto e obter respostas sen cambiar de aplicación. Outras funcións, como Circle to Search ou a vista dividida dos resultados de IA, facilitan a interacción co contido e a produtividade multitarefa. Tamén están dispoñibles asistentes de escritura e debuxo para traballar ideas de maneira visual e dinámica.
O Galaxy Z Fold7 xa pode reservarse e estará dispoñible en tendas o 25 de xullo en catro cores: azul intenso, gris prata, negro escuro e verde menta (esta última, só a través da tenda en liña de Samsung). Inclúe unha subscrición de 6 meses a Google AI Pro (con 2 TB de almacenamento na nube).
Os prezos deste dispositivo, susceptibles a importantes descontos, parten de 2.109 euros (actualmente para a versión de 512 GB), mentres que a versión con 1 TB de capacidade custará inicialmente 2.229 euros (aínda que o seu prezo oficial é de 2.529 euros).