O Surface Duo chegará a EE.UU. en setembro

mércores, 12 de agosto do 2020 Marcus Fernández

O pasado outubro Microsoft sorprendeu anunciando que estaba a preparar un par de dispositivos con dobre pantalla, no que semellaba un novo concepto de produto de transición até a popularización das pantallas flexibles. Un dos produtos, o Surface Neo, sería un portátil con Windows 10X, que por mor da crise sanitaria tería adiado o seu lanzamento até o ano que vén, pero o que cumprirá coa promesa de chegar ao mercado en 2020 é o Surface Duo, un smartphone con dúas pantallas conectadas por unha bisagra de 360 graos que busca levar a produtividade de Android a un novo nivel.
O Surface Duo porase á venda nos EE.UU: o 10 de setembro a un prezo de 1.399 dólares, ofrecendo un produto que a nivel de hardware non estaría á altura dos topes de gama actuais, pero que co seu software conseguirían personalizar a experiencia de Android conseguindo resultados moi interesantes para o traballo e a creación de contidos, ou sexa, que non se limitan a engadir unha segunda pantalla como fai LG cos seus móbiles insignia.
Este revolucionario smartphone funcionará cun procesador Qualcomm Snapdragon 855 (propio dos móbiles insignia do ano pasado), 6 GB de RAM, 128/256 GB de almacenamento interno UFS 3.0, dúas pantallas AMOLED 4:3 de 5,6 polgadas cunha resolución de 1.800 x 1.350 píxeles (que ao abrir o dispositivo conforma unha pantalla 3:2 de 8,1 polgadas), cámara de 11 Mpíxeles, Wi-Fi AC, Bluetooth 5.0, 4G, lector de impresións dixitais, batería de 3.577 mAh con carga rápida de 18 watts e a posibilidade de completalo cun Surface Pen, que convertería o Surface Duo nunha sorte de caderno (aínda que este dispositivo sería opcional).
As aplicacións para Android funcionarán no Surface Duo sen problema dende o primeiro momento, pero os desenvolvedores poderán optimizalas para a súa configuración de dobre pantalla, algo que inicialmente farán aplicacións como o Office de Microsoft ou a aplicación de lectura de libros electrónicos Kindle. Queda así por ver como mellorará a produtividade un dispositivo deste tipo, para ver se ten demanda dabondo para que continúen os desenvolvementos nesta dirección.

JPEG - 122 KB
As aplicacións ordinarias de Android funcionarán sen problema no Surface Duo

PUBLICIDADE