O Trivial Pursuit volve apostando polo xogo en liña

As consolas Xbox One, Xbox Series X|S, PS4, PS5 e Nintendo Switch e o servizo Stadia reciben hoxe o xogo Trivial Pursuit Live! 2, que adapta o formato do clásico xogo de mesa de preguntas repartidas en categorías que hai que dominar gañando cadanseu queixiño.
Este título conta con centos de preguntas novas, niveis de dificultade adaptados e unha diversa selección de personaxes que poden unirse á festa e gozar do xogo como se fose un grande concurso televisivo demostrando os seus coñecementos.
O xogo tamén permite enfrontarse por Internet a opoñentes de todo o mundo e incluso conta cun modo de retransmisión compatible co sistema de votación do chat de Twitch, o que permite competir cos espectadores e outros streamers, para o que só é precisa unha copia de Trivial Pursuit Live! 2. Sen dúbida, un xeito de revitalizar o xogo de preguntas e facilitar a súa popularización entre os seareiros das retransmisións de videoxogos en directo.
Ao estarmos ante un título dixital relativamente sinxelo, o seu prezo de lanzamento é moi axustado, vendéndose nas distintas plataformas a só 19,99 euros.