O Wi-Fire permite conectar con puntos de acceso Wi-Fi a 300 metros de distancia

martes, 21 de agosto do 2007 Marcus Fernández

Aínda que de cando en vez vexamos na prensa cómo algúns rapaces rachan con tódalas marcas anteriores de distancia establecendo comunicacións sen fíos, os usuarios de portátiles con Wi-Fi incorporado normalmente ven como os seus equipos só se poden conectar a uns poucos metros do punto de acceso máis próximo, pero o fabricante norteamericano hField Technologies promete cambiar a situación cun novo dispositivo USB.
O Wi-Fire é un adaptador Wi-Fi por USB que se pode adherir ó portátil coma moitas cámaras web (cunha especie de pinza) que promete establecer conexións a distancias de ata 1.000 pés (uns 300 metros) o que mellora considerablemente as coberturas habituais (chegando case a triplicalas), aínda que se consegue grazas a que en realidade utiliza unha antena direccional que pode xirar 360º para acadar a mellor conectividade.
O novo dispositivo destaca por ter un tamaño reducido (semellante ó dunha axenda electrónica) e un prezo axustado (79 dólares) e na propia web do fabricante ilustran con 3 casos de uso para ver a utilidade e capacidade do Wi-Fire que podería ser a resposta para moitos usuarios que teñen conexións Wi-Fi preto, pero non son capaces de conectar ás mesmas (ou o fan a velocidades limitadas e con cortes constantes).

PUBLICIDADE