O Xperia 10 III Lite aposta pola calidade de imaxe e son contendo o seu prezo

venres, 20 de agosto do 2021 Marcus Fernández

Facendo máis accesibles os seus móbiles, Sony lanza unha nova versión do seu Xperia 10 III engadíndolle a etiqueta Lite, o que supón que mantén boa parte das especificacións reducindo considerablemente o seu prezo. Concretamente o Sony Xperia 10 III Lite é un móbil 5G con procesador Qualcomm Snapdragon 690 con 6 GB de RAM e pantalla OLED de 6 polgadas, HDR e formato ultra panorámico, que como compromiso reduce a súa capacidade de almacenamento a 64 GB (ampliable mediante tarxetas de até 1 TB), elimina a radio FM e engade o soporte de eSIM.
Este novo teléfono está equipado cunha cámara traseira tripla, cun sensor principal de 12 Mpíxeles, un grande angular de 8 Mpíxeles e un teleobxectivo de 8 Mpíxeles; mentres que a cámara frontal ten un sensor de 8 Mpíxeles. Este terminal con tamaño bastante compacto ten unha batería de 4.500 mAh que garante unha boa autonomía e, como detalle especialmente a destacar deste dispositivo estaría que conta con conector para auriculares con soporte para Hi-Res Audio, polo que poderiamos dicir que estamos ante un teléfono orientado a usuarios que buscan un bo son e unha boa imaxe (tanto na pantalla como na cámara).
O Sony Xperia 10 III Lite chegará ao mercado xaponés o vindeiro día 27 a un prezo de partida de 46.800 iens (364 euros), facendo bastante accesible un dispositivo de grande calidade do que polo momento descoñecemos cando chegará a España e a que prezo.

O Xperia 10 III Lite mantén o minijack de auriculares para poder ofrecer son de calidade
O Xperia 10 III Lite conta con resistencia IP68

PUBLICIDADE