O YotaPhone venderase internacionalmente antes do Nadal

Hai preto dun ano amosábase ao mundo o sorprendente smartphone YotaPhone, que apostaba por contar con dúas pantallas (unha LCD e outra de papel electrónico), finalmente vai ver a luz fóra de Rusia no mes de decembro, de xeito que poderá adquirirse internacionalmente antes do Nadal, agardándose que teña un prezo duns 500 euros.
O YotaPhone é un terminal con Android 4.2.2 construído nunha única peza cun grosor de 9,9 milímetros e un peso total de 146 gramos, que ten no seu interior un procesador Krait de dobre núcleo a 1,7 GHz, 2 Gb de RAM e 32 Gb de almacenamento interno; aínda que o máis rechamante é que no seu exterior presenta unha pantalla LCD táctil de 4,3 polgadas cunha resolución de 1.280 x 720 píxeles e, pola outra cara, unha pantalla táctil EPD (semellante á tecnoloxía eInk) de 4,3 polgadas cunha resolución de 640 x 360 píxeles e 16 tons de gris, que permitiría conseguir unha impresionante autonomía ao non ter que acender a pantalla LCD para as funcións básicas do teléfono ou, por exemplo, para consultar a hora.
Este interesante móbil tamén conta con Wi-Fi N, Bluetooth 4.0, GPS, cámaras de 13 e 1 Mpíxeles, conectividade 4G, radio FM e batería de 1.800 mAh.