O alumnado do Centro de Formación Audiovisual de Lugo enche as redes de vídeos contra a violencia machista
xoves, 26 de novembro do 2020
A
Deputación de
Lugo conmemorou nas redes a loita contra o machismo, con motivo do
Día contra a Violencia de Machista (este 25 de novembro). Fíxoo
en estreita colaboración co alumnado do Centro de Formación
Audiovisual (dependente da entidade lucense) e as persoas residentes
dos catro centros de maiores provinciais. O programa de actividades
incluíu unha fogueira en homenaxe ás vítimas, actuacións musicais
e a subida ás redes sociais dunha serie de vídeos para “visualizar,
concienciar e loitar contra a violencia machista”. A comunidade de
usuarios das residencias participou en parte dos audiovisuais
recitando estrofas da obra Poema á muller galega, de Manuel
María.
Así
mesmo, a Deputación, o Concello de Lugo e a Subdelegación do
Goberno reivindicaron o remate das violencias machistas nun acto
conxunto que consistiu nun minuto de silencio, a lectura dun
manifesto e a solta de globos en recordo das mulleres asasinadas.
Rivera
Capón, deputado de Promoción Económica e Social, destacou a
“importancia destas actividades que contribúen a concienciar á
cidadanía a través dos máis novos e as persoas maiores”. Fíxoo
durante a súa visita ao Centro de Formación Audiovisual (CFA)
durante os últimos preparativos das actividades. Os estudantes de 1º
de Produción foron os encargados de idear, organizar e elaborar o
material de todas as actividades, que tiveron que adaptarse á actual
situación sanitaria, co obxectivo de “cumprir escrupulosamente con
todas as medidas de seguridade”.
Os
vídeos
A
programación arrancou o martes coa publicación de tres vídeos, que
poden verse nas redes sociais do Servizo de Audiovisuais (antiga
Fundación TIC da Deputación). Estes traballos, elaborados nas
últimas semanas polo alumnado coa participación dos actores Anxo
Fernández, María Pichín e Lucía Parga, teñen por obxectivo
“visualizar, concienciar e loitar contra a violencia machista”.
No primeiro deles, as e os estudantes fan un chamamento aos medios de
comunicación sobre as consecuencias que a actual pandemia sanitaria
está a ter ao ocultar graves problemas sociais como a violencia
machista; noutro dos vídeos, sobre o ciclo da violencia machista,
amósase a evolución dunha parella na que a muller é a vítima; e
por último, no terceiro audiovisual o alumnado representa a actitude
dos sectores negacionistas ante feitos evidentes.
Pola
súa banda, os usuarios e usuarias das catro residencias de maiores
da Deputación tamén se sumaron aos actos polo 25N. Concretamente,
gravaron audiovisuais recitando estrofas da obra Poema á Muller
Galega, de Manuel María. Con todo ese material, o Servizo de
Audiovisuais da institución provincial elaborará unha peza para que
os residentes dos centros de maiores de Trabada, A Fonsagrada, Pol e
Ribadeo a teñan para o seu recordo.