O blogueiro Enrique Dans participará na xornada sobre dirección empresarial de Ajevigo

luns, 5 de novembro do 2007 Raquel Noya

O vindeiro luns 12 de novembro, a Asociación de Xóvenes Empresarios de Vigo, Ajevigo, vai levar a cabo a súa VI Xornada de Alta Dirección Empresarial (JADE): Cara a Sociedade da Información no Centro Social Caixanova da cidade. Estas xornadas, que contan como relator destacado co profesor de Sistemas e Tecnoloxías da Información no Instituto de Empresa, Enrique Dans, pretenden continuar coa experiencia do Congreso Xoven Empresario de achegar ás empresas asociadas relatores de recoñecido prestixio a nivel nacional e internacional na materia a tratar, que desta ocasión volta é a innovación.
Ademais desta JADE, Ajevigo vai ofertar, ó longo de todo o mes de novembro, cursos de formación nesta materia, de carácter gratuíto e que están abertos á participación de emprendedores e empresarios de toda Galicia.
O primeiro destes cursos, Curso SIC: Xestión e Servizos, dará comezo mañá martes 6 de novembro e abranguerá as áreas de coñecemento da Xestión de Servizos a través do emprego da informática e a comunicación electrónica así como das boas prácticas contidas nas normas ITIL destinadas a axudar e mellorar o aprovisionamento e emprego eficaz dos servizos informáticos no ámbito da empresa. O devandito curso está financiado pola Consellaría de Innovación e Industria e a Fundación Caixanova polo que a súa inscrición será de balde.

PUBLICIDADE