O boom do teléfono celular invade India

As imaxes tradicionais do país asiático están a mudar de xeito significativo, e agora calquera das rúas das principais urbes da India amosan as mesmas mareas humanas ca nas últimas décadas, pero cunha pequena gran diferenza: case todas as persoas que a compoñen levan un teléfono celular na man. O emerxente mercado Indio xa concentra as miradas dos fabricantes e provedores de teléfonos e servizos de comunicación móbil, xa que segundo un artigo da BBC, estas novas tecnoloxías acadan até 6 millóns de novos clientes cada mes, e o número de usuarios na actualidade chega ós 118 millóns.
O segredo semella estar en que as compañías cobran tarifas asequibles por chamada, e que empresas coma Nokia (que ten vendido preto de 85 millóns de teléfonos no país do Taj Mahal) xa ten coma obxectivo prioritario este mercado. Até os encargados de contas desta compañía con sede de operacións na península escandinava auguran que para o ano 2010 os indios superarán ós estadounidenses en consumo de celulares e colocaranse no segundo posto mundial detrás de China.