O campionato D3Mobile acada récords de participación malia a crise sanitaria
venres, 29 de maio do 2020
A
nova edición do campionato científico internacional de modelado en
tres dimensións a través dos dispositivos móbiles, D3Mobile
2020, vén de acadar dous
importantes fitos na súa traxectoria, co engadido de extra de
logralos no medio da adversidade que supón a pandemia e a crise
sanitaria: por unha banda obtivo récord de participantes finalistas
e, pola outra, foi obxecto dun recoñecemento explícito por parte da
Universidade de Florencia, que enxalzou como “perfecto” o seu
modelo educativo. Cómpre lembrar que o certame vén da man do Grupo
Integrado de Enxeñaría Civil e Xeomática (Cigeo) da Escola
Politécnica Superior de Enxeñaría (EPSE) do Campus de Lugo da USC.
A
decisión inicial de dar continuidade ao certame malia o Estado de
Alarma (determinación adoptada polos organizadores do campionato
debido á natureza do concurso, cuxo modelo online e
tecnolóxico viña preparado para adaptarse perfectamente ás novas
circunstancias), traduciuse varios meses despois “nun éxito
absoluto”, informan, materializado tanto nunha cifra récord de de
finalistas (o número de participantes totais foi de 496 estudantes e
120 profesores de 99 centros educativos de 17 países de todo el
mundo), como nos diversos eloxios recibidos da comunidade educativa
internacional.
Unha
das maiores gabanzas á D3Mobile foi a realizada pola profesora
Parisi, da Universidade de Florencia, que colabora co grupo Cigeo da
USC nesta edición do campionato, que durante a fase confinamento
social decretada nesta rexión italiana, manifestou a través das
redes sociais que “a situación de alarma sanitaria forzounos mudar
a nosa forma de ensinar e logo de meses de reflexión sobre novos
enfoques educativos axeitados para este tipo de situacións
excepcionais, concluímos que o proxecto D3Mobile sintetiza os
elementos fundamentais dun modelo perfecto para este fin”.
Fases
do concurso e votacións públicas
Unha
vez avanzadas as distintas fases da competición nas que se estrutura
D3Mobile e logo de que os distintos equipos participantes presentaran
as súas respectivas propostas de traballo, que están accesíbeis na
web do certame, os 29 modelos 3D presentados por los equipos
finalistas desta edición serán valorados por parte do público nun
proceso de votación aberto que se desenvolverá en liña a partir do
1 de xuño na páxina do
campionato. O público participante determinará un dos galardóns
outorgados os gañadores, ademais do premio ao equipo que acade o
maior número de seguidores e consiga máis impacto na súa contorna
social.
Tamén
se distinguirán os equipos que presenten os mellores resultados nas
medicións de precisión feitas en modelos 3D, así como os equipos
con modelos 3D escaneados con maior calidade.
Completan
a relación de galardóns un premio ao modelo 3D dedicado á
investigación na USC, outro ao labor de I+D desenvolvido no marco da
agrupación estratéxica BioReDes do Campus Terra e un premio doado
pola Fundación Mujeres e referido a unha científica/tecnóloga de
éxito nos eidos da enxeñaría e da arquitectura. O fallo dos
galardóns será público a finais do mes de xuño.