O centro atlanTTic da UVigo abriu as súas portas a alumnado e público en xeral

luns, 23 de outubro do 2023 S. P.

Dende as páxinas de Código Cero xa apuntamos a este venres 20 de outubro como data de portas abertas nunha xornada organizada polo Centro de Investigación en Tecnoloxías de Telecomunicación, atlanTTic da Universidade de Vigo, á que estaba convidado o alumnado de varios institutos de ensino medio en Vigo. A iniciativa Conecta con atlanTTic ten como finalidade achegar á cidadanía galega as instalacións, laboratorios e principais liñas de traballo deste centro.
Durante a visita alumnas e alumnos tiveron a oportunidade de coñecer de preto as instalacións e o equipo de traballo deste centro, participando en demostracións sobre comunicacións 5G, ópticas e vía satélite, e falando coas investigadoras e investigadores sobre proxectos como Panoramix, centrado na detección do deterioro cognitivo en persoas maiores, ou Celia, un chatbot con empatía para entreter e acompañar a persoas maiores. Familiarizáronse tamén cos sistemas de radar e xeoposicionamento; a aplicación SignaMed, que traballa no recoñecemento automático de lingua de signos para facilitar a comunicación coas persoas xordas; e Lightboard, un taboleiro de cristal luminoso para a educación dixital.
Alén disto, as persoas asistentes participaron nas visitas guiadas aos laboratorios, como o de Seguimento de satélites; o de Acústica, incluída a sala de control non-environment e a sala semi-anecoica, acondicionadas coa tecnoloxía Metadyne, material que permite absorber as ondas acústicas; e o laboratorio QOPHI, centrado na investigación e deseño de dispositivos fotónicos integrados, onde se puxeron ao día sobre a revolución que supoñen os chips que empregan esta tecnoloxía.
Engadir que nesta visita o alumnado, principalmente da ESO, de Bacharelato Tecnolóxico e dun ciclo de FP, aproveitou para interesarse polo labor cotián das investigadoras e investigadores dun centro de investigación e como repercute o seu traballo na sociedade.
A Xornada de Portas Abertas de atlanTTic continuou pola tarde dese mesmo día pero encamiñada ao público xeral.

PUBLICIDADE