O centro atlanTTic traballa nun proxecto europeo para a integración laboral de mulleres migrantes
venres, 31 de marzo do 2023
O
centro atlanTTic (UVigo) compartiu detalles dun relevante proxecto
europeo destinado a fomentar a integración laboral das mulleres
migrantes mediante redes. Foi posto en marcha en 2022 coa
participación dun grupo multidisciplinar de persoal docente e
investigador da Universidade de Vigo. Trátase
de Worldplaces. Workplaces working for women’s integration,
do que vén de abrollar unha iniciativa complementaria: o portal
Thinkilusion, que proporciona a profesionais do ámbito
socioeducativo ferramentas e exemplos para facilitar a inclusión de
colectivos vulnerábeis.
Media
ducia de países europeos
O
proxecto Worldplaces está financiado pola Comisión Europea a través
da Convocatoria AMIF-2020-AG-CALL (Transnational Actions on
Asylum, Migration and Integration). Cun orzamento total de
arredor dun millón de euros, na iniciativa participan xunto á UVigo
entidades de Grecia, Alemaña, Portugal, Bélxica, Italia e Austria,
sendo liderada pola Cooperativa Sociale Quid de Verona (Italia). No
caso da Universidade de Vigo, participa a través de atlanTTic
persoal docente e investigador da Facultade de Educación e Traballo
Social; da Facultade de Filoloxía e Tradución e da Escola de
Enxeñería de Telecomunicación. Coordinado polo catedrático Manuel
Fernández, o equipo de Worldplaces na UVigo está integrado por Pino
Díaz; Carmen Ricoy; Edita de Lorenzo; Maribel del Pozo, Íñigo
Cuíñas; Enrique Costa; Manuel Caeiro e Joseba Delgado.
O
portal
Thinklusion
é un portal web de recursos que pretende “ofrecer ferramentas que
axuden á integración das mulleres migrantes no seu novo contexto
social e laboral”. A súa misión, engade o equipo de atlanTTic, é
“o apoderamento das persoas, en especial as máis vulnerábeis,
empregando metodoloxías creativas que lles proporcionen autonomía,
capacidade de adaptación e faciliten a súa inclusión”. Para
acadalo, o portal facilita ferramentas e modelos destinados
principalmente a profesionais da intervención socioeducativa co fin
de que coñezan a metodoloxía do deseño intelixente (design
thinking) e dispoñan de
recursos para a súa aplicación con colectivos en risco de
exclusión.
A
metodoloxía do deseño intelixente, segundo indican as e os
responsábeis da iniciativa, “proporciona un proceso de
intervención organizado en cinco fases que perseguen obxectivos
delimitados e avaliábeis, medindo así as melloras e eficiencia no
proceso de toma de decisións, tanto da organización como das
persoas usuarias”. Trátase, apuntan, dun proceso estruturado que
proporciona ás persoas desenvolvemento de estratexias autónomas
para identificar problemas; busca de formas diverxentes e creativas
para resolvelos; decisión autónoma do camiño a seguir;
planificación das súas propias accións e avaliación do resultado
e mellora do seu proceso.
As
diferentes ferramentas propostas están organizadas en función das
fases da metodoloxía design thinking (empatizar, definir,
idear, prototipar ou realizar), dos instrumentos (avaliación,
intervención ou organización) e do tipo de agrupamento que permiten
(individual ou colectivo), podendo as persoas usuarias utilizar
filtros e seleccionar aquelas que se poidan adaptar mellor á
situación das persoas coas que van a intervir, ou transformándoas
segundo as necesidades detectadas.
AtlanTTic
tamén explica que a case trintena de ferramentas que xa presenta a
web son “moi diversas”. Entre elas está a análise DAFO,
para organizar as debilidades, fortalezas, ameazas e oportunidades
coas que conta a persoa á que se destina a intervención; Memorias,
para coñecer a súa propia historia mediante obxectos ou fotografías
persoais; DCBE, para avaliar o seu desenvolvemento de
competencias básicas de empregabilidade, ou PIC-A, para
avaliar o seu pensamento diverxente (verbal, gráfico e xeral).
Tamén
hai recursos como a Ruleta das necesidades, que quere
facilitar o proceso de xeración de diferentes necesidades atendendo
a temáticas preestablecidas; Brainstorming cooperativo, para
ofrecer ideas con utilidade para resolver cooperativamente un reto;
ou Debuxa a túa idea, para representar graficamente os pasos
a seguir para levar a cabo a idea proposta.
Estas
ferramentas son aplicadas na web en cinco casos concretos que,
segundo apuntan dende o centro vigués, “funcionan como modelos
inspiradores e nos que se pode comprobar como a metodoloxía design
thinking pode mellorar a calidade de vida das persoas máis
vulnerábeis”.