O centro tecnolóxico ITG incrementará o seu persoal con 7 novas incorporacións
xoves, 28 de outubro do 2021
O
Instituto Tecnolóxico de Galicia (ITG) anunciou que vai incrementar
o seu persoal no último trimestre de 2021. Farao con sete novos
postos de perfís cualificados cos que o centro TIC galego aposta
“pola xeración de emprego” nos tres eidos de actividade onde foi
recoñecida como centro de excelencia en España: a Intelixencia
Artificial, a Transición Enerxética e a Mobilidade Aérea Autónoma.
Os postos están en proceso de selección e poden ser consultados na
súa web e redes sociais.
O
centro tecnolóxico con sede na Coruña contará, trala incorporación
destes perfís, con preto dun centenar de empregados, logo de
aumentar un 15% o seu persoal no último ano e “incorporando cada
vez perfís máis especializados”, segundo explica Félix
Rodríguez, responsábel de Comunicación de ITG, que engade que
“somos talento buscando talento e apostamos decididamente por crear
canteira tecnolóxica e investigadora en Galicia e tamén por
retornar profesionais altamente especializados con experiencia
posdoutoral en institucións europeas”. Rodríguez salienta que
algunhas incorporacións recentes ao centro tecnolóxico traballaban
previamente en países como Reino Unido, Irlanda, Francia, Italia ou
Alemaña, así como noutras zonas de España, principalmente Madrid e
Barcelona.
A
día de hoxe, ao redor do 40% do persoal do ITG está constituído
por perfís de Enxeñaría en Informática, e outro 40% por
especialistas en diferentes ramas de Enxeñaría Industrial,
Aeroespacial e de Telecomunicación. Amais, as persoas formadas en
arquitectura tamén teñen unha presenza destacada no centro,
alcanzando un 10% do total.
A
respecto das posibilidades profesionais que brinda o instituto,
Rodríguez engade que o ITG é especialista en desenvolvemento de
solucións que fan de ponte entre a Investigación e o
Desenvolvemento, por unha banda, e o mercado, pola outra. A isto,
“súmase un ambiente laboral acorde coas novas tendencias
profesionais, baseado en factores como a flexibilidade, a
conciliación, a proactividade e o traballo colaborativo en equipos
multidisciplinares”. Polo que respecta aos procesos de selección
“cada vez percibimos máis a esixencia dun compromiso ético e
social por parte do empregador, e non abonda, por exemplo, que o ITG
estea adherido aos Obxectivos de Desenvolvemento Sustentábel de
Nacións Unidas, que o está; o que ilusiona e atrae o talento é ver
como contribuímos activamente desde a nosa actividade diaria a
moitos dos 17 Obxectivos”, conclúe Félix Rodríguez.