O clásico Abu Simbel Profanation terá secuela retro

xoves, 10 de agosto do 2017 Marcus Fernández

JPEG - 58.4 KB
Imaxe do xogo orixinal para Amstrad CPC

No ano 1985 Dinamic Software comercializou para ZX Spectrum, Amstrad CPC e MSX o xogo Abu Simbel Profanation, título protagonizado por un humano transformado nunha estraña criatura pola maldición de Abu Simbel que tiña que superar numerosos obstáculos no interior da pirámide na que está soterrado Abu Simbel para conseguir recuperar a súa forma humana. Estes retos consisten principalmente en dar saltos e avanzar en momentos moi concretos evitando trampas e inimigos, no que está considerado como un dos xogos máis difíciles da súa xeración, e que non vai deixar aos nostálxicos coas ganas de ter retos semellantes no futuro, xa que Daniel Celemín, un dos responsables de La Abadía del Crimen Extensum, membro do equipo de desenvolvedores retro 4MHz, está a preparar Profanantion 2, xogo que promete manter a dificultade extrema do xogo orixinal.
Profanation 2: Escape from Abu Simbel conta tamén con Javier García Navarro no seu equipo de desenvolvemento e John McKlain no apartado sonoro, e busca ser un digno herdeiro do xogo orixinal na súa versión para Amstrad CPC, co que buscará a máxima fidelidade.
O xogo desenvólvese co motor la hormigonera de 4MHz, ao que García Navarro está a facer adaptacións para conseguir que este novo título poida funcionar con só 64 KB de memoria, abandonando os 128 KB de traballso anteriores do equipo, o que supón un maior reto a nivel de optimización, pois dende os gráficos até a música, pasando polo propio código teñen que procurar un aproveitamento máximo dos recursos dispoñibles nos ordenadores persoais que tan bos momentos deron na segunda metade dos anos 80.
Para deixar claro que este traballo avanza a bo ritmo, veñen de publicar primeiro vídeo de Profanation 2 en acción:

PUBLICIDADE