O comercio do centro histórico compostelán venderá online e de balde a través de Correos Market

martes, 29 de novembro do 2022 S. P.

José Manuel Bello Rey, presidente da Asociación de Empresarios Compostela Monumental e da Confederación Española de Centros históricos (COCAHI), e Manuel Serrano, presidente de Correos, asinaron este martes 29 de novembro un acordo de colaboración en Madrid para que todos os comercios e empresas situadas nos centros históricos de España poidan vender de forma gratuíta a través da plataforma Correos Market.
“É unha gran noticia para a actividade comercial e empresarial dos centros históricos de España o poder contar como socio para as vendas online cunha gran institución como Correos España, hoxe é un gran día para o noso comercio”, comentou Bello Rey.
O acordo asinado pretende fomentar sinerxías entre ambas as institucións para fortalecer aos comercios e empresas dos centros históricos, ofrecendo servizos como o devandito Correos Market, o Servizo Especial de Paquetería, O Camiño con Correos e Solucións Ecommerce, implantando unha plataforma de comercio electrónico para a venda de produtos.
Este convenio pon á disposición do comercio e empresariado dos centros históricos o servizo especial de paquetería que ten na súa web, www.correos.es, para que poidan realizar envíos “a un prezo competitivo” e “utilizar os valores engadidos que ten este servizo como a recollida en tenda e a domicilio para comerciantes e particulares”. Cabe destacar tamén, o servizo O Camiño con Correos, para promover os distintos itinerarios composteláns e as diferentes localidades polos que transcorre, así como os produtos que ofertan os comercios locais.

PUBLICIDADE