O concerto da Real Filharmonía nas Festas do Apóstolo retransmítese este xoves por streaming

No marco da programación das Festas de Apóstolo de Santiago de Compostela organizadas polo Concello, vaise retransmitir por streaming, este xoves 30 de xullo, o concerto da Real Filharmonía de Galicia dende a praza da Quintana. Farase a través do Facebook e tamén do Youtube.
O recital achégase tamén en formato en liña por mor das medidas de distanciamento aplicadas para atallar a COVID por parte do Concello e a imposibilidade de acadar entrada, debido á limitación do aforamento, para unha boa parte das nosas seareiras e seareiros da música clásica.
Por este motivo, o Concello e a Real Filharmonía xuntan forzas para permitir o máximo seguimento do espectáculo Feliz aniversario, Beethoven!, unha viaxe pola música e a vida do xenial compositor do 250º aniversario do seu nacemento. A batuta levaraa o mestre titular, Paul Daniel, e a actriz María Vázquez será a presentadora.