O congreso de videoxogos e educación que se celebra en Pontevedra acollerá unha game jam de tres días
xoves, 13 de outubro do 2016
Este mes temos pola banda
de Vigo un evento que toca de ben de preto á crecente comunidade
galega de desenvolvedores de propostas tecnolóxicas de lecer para
fines docentes e divulgativos. Dito doutro xeito e para que se
entenda: desenvolvedores de xogos para educar. Falamos da cuarta
edición do IV
Congreso Internacional de Videoxogos e Educación (CIVE 2016).
Celebrarase,
tal e como anunciamos este verán dende Código Cero, entre os
días 25 e 28 de outubro na Facultade de Ciencias Sociais e da
Comunicación do Campus da Xunqueira en Pontevedra. Entre os puntos
fortes do seu programa destaca sen dúbida unha Game
Jam para lanzarnos en colectividade a crear produtos de lecer
destinados a mellorar e ampliar as tarefas docentes e, por que non?,
para mellorar o mundo.
O Congreso apoiarase
sobre catro piares temáticos: o que fará o xogador, as mecánicas
do xogo, a estética e a tecnoloxía. A partir de aí, tocaranse
cuestións máis específicas como os videoxogos na atención á
diversidade, o ensino lúdico, os videoxogos e o desenvolvemento das
intelixencias múltiples, os videoxogos e a arte, a realidade
aumentada e o seu potencial, os mundos virtuais, a creación e
desenvolvemento de videoxogos, etc.
Este encontro está
promovido pola asociación de investigadores Alfas, e chegará por
primeira vez a Galicia tras pasar por Valencia, Cáceres e Bos Aires.
Como dixemos, de xeito
paralelo ao congreso tamén terá lugar unha Game Jam, na que
grupos de até catro persoas (das que como mínimo unha ten que ser
un estudante universitario) competirán na creación dun xogo para
web e/ou dispositivos móbiles dentro das temáticas propostas ao
inicio da actividade.
Obxectivos
O primeiro obxectivo do
congreso é “fomentar e facilitar a relación entre académicos
nacionais e internacionais que traballan en estudios de deseño e
desenvolvemento de produtos de lecer interactivo de educación e
formación”. Ademais, búscase estreitar as ligazóns entre as
entidades de formación centradas no devandito ámbito tecnolóxico e
os axentes da industria.
Tamén se pretende que a
mocidade interesada na creación de produtos interactivos de
entretemento poidan participar no devandito Game Jam. Esta
actividade, que se desenvolve conxuntamente co Concello de
Pontevedra, servirá entre outras cousas para impulsar a creación de
videoxogos educativos e divulgativos con vontade de “informar,
formar, denunciar e simular”. Segundo informa a organización do
CIVE poñéndonos en situación, unha game jam é un evento
que consiste “na materialización rápida de videoxogos”, na que
os participantes reúnense en pequenos equipos “de maneira
improvisada e espontánea” para dar forma a un videoxogo nun
período de tempo moi limitado competindo uns equipos contra outros.
Neste caso concreto, o período de tempo é de tres días.
A competición está
dirixida a todo tipo de programadores, deseñadores, artistas, etc.
de videoxogos co requisito de que sexan maiores de idade. Cada equipo
estará formado por 4 ou 5 participantes. O número máximo de
participantes será de 40. O proxecto a entregar deberá ser un
videoxogo con “polo menos un nivel operábel completo”.