O coworking TIC de Ames toma nota da experiencia do Pazo de Arenaza para a súa vindeira posta en marcha
xoves, 4 de xuño do 2020
Este
xoves 4 de xuño o
Pazo de Arenaza en Oleiros, espazo de coworking da Deputación
da Coruña, acolleu unha xuntanza para dar un novo e relevante
impulso á Rede Provincial de Espazos de Traballo Colaborativo,
que impulsa a entidade coruñesa en Oleiros pero tamén en Ames,
Brión, Boiro, Carballo e Moeche. Na xuntanza deste xoves participou
unha delegación do Concello de Ames, encabezada polo alcalde, José
Miñones, e a concelleira de Promoción Económica, Ana Paz. Segundo
lembraron, o polígono Novo Milladoiro, emprazado no devandito
concello, dará acollida ao que será un dos grandes centros
referenciais de traballo cooperativo e innovador da nosa terra. Será
o Centro de Coworking A Proa, centrado en contidos tecnolóxicos.
A
visita deste xoves forma parte dun periplo polos diferentes espazos
da devandita Rede co fin de compartir recursos, achados e
metodoloxías.
Na
visita, a delegación amesá puido coñecer con detalle a estrutura e
a xestión do que foi primeiro espazo de coworking habilitado
pola Deputación da Coruña, que leva funcionando máis dun ano e que
está centrado na incubación e o lanzamento de proxectos
emprendedores da área da arquitectura e o urbanismo.
Durante
dúas horas, técnicos da área de Emprego da Deputación explicaron
aos representantes de Ames os detalles, particularidades e potenciais
do centro, así como a experiencia vivida desde a súa posta en
funcionamento.
O
espazo colaborativo do Pazo de Arenaza serve como base fundamental de
proxectos de arquitectura, urbanismo, enerxías renovábeis ou deseño
de interiores, con diferentes postos e salas de reunións habilitadas
para o desenvolvemento dos traballos por parte dos/as
emprendedores/as, que tamén tiveron oportunidade de trasladar
persoalmente as súas impresións ao alcalde de Ames, concello onde a
Deputación, xunto co Goberno local, pretende pór en marcha un novo
centro de traballado innovador e cooperativo, situado no parque
empresarial Novo Milladoiro, que se centrará nos ámbitos das novas
tecnoloxías e do sector audiovisual. Segundo fixeron saber, este
espazo comezará a súa actividade en datas vindeiras, “o antes
posíbel”. Dende alí, sinalou o alcalde, darase impulso a
proxectos emprendedores centrados na innovación, a tecnoloxía e o
sector audiovisual, “puntos fortes de Ames”, recoñecida no seu
día coa distinción de Cidade da Ciencia e Innovación.
Na
xuntanza deste xoves 4, a coordinadora do plan PEL da Deputación,
Marisa Lista, explicou os aspectos máis relevantes do funcionamento
do Pazo de Arenaza. Por parte da empresa xestora do mesmo,
avanzáronse ideas para ter en conta por parte do Concello de Ames
sobre a xestión e control de accesos, así como na dinamización do
espazo, punto clave para o bo desenvolvemento dos proxectos.
O
alcalde de Ames, Jose Miñones, salientou que “o obxectivo é poder
ofrecer o mellor servizo posíbel e de aí que queiramos ver como
funcionan outros espazos que xa contan con experiencia”. Por outra
banda, a concelleira de Promoción Económica, Ana Paz, sinalou “que
xa estamos traballando no regulamento que rexerá A Proa, así como
na ordenanza fiscal, polo que coñecer os aspectos que funcionaron
noutros espazos permitirá mellorar ou noso espazo colaborativo”.