O décimo aniversario da Casa da Xuventude de Lugo será unha festa creativa das redes sociais
mércores, 31 de marzo do 2021
- A alcaldesa Lara Méndez e a concelleira Ana Abelleira nas instalacións da Casa da Xuventude
O
Concello de Lugo vai celebrar ao grande o décimo aniversario da Casa
da Xuventude, este 9 de abril. Farao poñendo o foco na mocidade e
nas que son xa as súas ferramentas tecnolóxicas preferidas: as
redes sociais. O
programa foi dado a coñecer pola alcaldesa Lara Méndez, e a
concelleira de Xuventude, Ana Abelleira. As accións vanse
desenvolver os días 9, 10 e 11 de abril combinando actos
presenciais, online e máis o uso das redes sociais. Haberá
exposicións, a presentación do Dicionario Galego para boomers,
actividades de escape room, rutas, faladoiros e música.
A intención é “dar voz á poboación xuvenil, que ten moito que
dicir sobre a cidade e a sociedade que construímos entre todas e
todos”.
Como
dixemos, a programación do décimo aniversario desenvolverase
durante a fin de semana do 9, 10 e 11 de abril. A concelleira Ana
Abelleira sinalou que debido as restricións sanitarias, “non
realizaremos actividades multitudinarias, como quixésemos, pero
faremos un esforzo importante con pequenas accións presenciais e
moitas actividades online, estando moi presentes tamén nas
redes sociais”.
Venres
9 de abril
O
aniversario arrincará ás 18.00 horas do venres, 9 de abril, cun
acto institucional e co xornalista xornalista Baruk Domínguez como
mestre de cerimonias. Montarase un photocall para a ocasión e
descubrirase un novo graffiti na fachada da Casa da Xuventude, que
será a súa nova imaxe. Ademais, a escola de danza Gravitty Lugo
apoiará a gravación dun baile a través de Tik Tok.
Ás
19.00 horas inaugurarase a exposición da fotógrafa Adra Pallón.
Baixo o título A crise industrial.
Ás
19.30 horas presentarase o Dicionario galego para boomers,
elaborado polo alumnado de 1º da ESO do instituto lugués Leira
Pulpeiro. As e os creadores recollen neste traballo definicións de
conceptos empregados no día a día polas mozas e mozos.
Este
primeiro día de celebración tamén contempla un escape
room de misterio no interior da Casa da Xuventude.
Esta actividade estenderase ata o 17 de abril. As inscricións poden
realizarse xa a través da web xuventudelugo.gal.
Sábado,
10 de abril
Ás
11.00 horas, Julen Bollain dará a coñecer online o libro Hoy
es mañana, un ensaio para a mocidade, no que participan 10 mozas
e mozos profesionais de distintas materias e que aborda a necesidade
de repensar o futuro e decidir de forma colectiva o mundo
postpandemia que se desexa. Ás 12.00 horas comezará unha ruta sobre
a Arte Urbana en Lugo, da man do guía Guido Álvarez. O punto de
partida e de chegada é a Casa da Xuventude e é preciso inscribirse
en xuventudelugo.gal.
Pola
tarde, dende as 17.00 horas, o protagonista será o rap, co obxecto
de promover o talento musical da mocidade luguesa neste xénero.
Domingo,
11 abril
Ás
11.00 horas presentarase vía online o libro Tú no eres tu
selfie: 9 secretos digitales que todo el mundo vive y nadie explica,
da autora Liliana Arroyo.
Ás
12.00 horas, a mocidade poderá participar na ruta O Lugo da
Xuventude, dirixida por Guido Álvarez. Pola tarde, o Concello
programou Faladoiros de Xuventude Activa, a partir das 17:00 horas,
onde se quere dar voz á mocidade e as súas inquietudes. Neles
participarán Ruben Hamade Longarela e Gael Zarza Arias, de Gravitty
Lugo; Nacho Ozores Mosquera, director e editor, que presenta o seu
corto Mentres isto pasa, nomeado aos Mestre
Mateo; Cintia Folgueira Cobos, investigadora postdoutoral no Centro
Nacional de Investigacións Cardiovasculares (CNIC); Paula Rodríguez
Villamayor, premio Talento Mozo de Galicia, na modalidade de Rural;
Héctor Castiñeira, coñecido como Enfermera Saturada; Diego AS,
grafiteiro lucense, semifinalista da Liga Nacional de Graffiti; Talía
Rodríguez, gañadora do 1º premio do certame #LugoEnIgualdade; Mº
Isabel Casanova, a protagonista do vídeo premiado; e alumnado de 1º
da ESO do IES Ánxel Fole, gañadores do 2º premio do certame
#LugoEnIgualdade.
O
broche de ouro porao o grupo de indie-rock Forget La France.
Maratón
fotográfico en Instagram
Coincidindo
coa celebración dos actos conmemorativos do 10º aniversario,
Xuventude convoca un maratón fotográfico para premiar a
creatividade e técnica da mocidade. Poden presentarse persoas de 14
a 35 anos, empadroadas no concello de Lugo, ou que traballen ou
estuden no municipio, que teñan unha conta de Instagram pública.
Tamén deberán seguir a conta de Xuventude en Instagram:
@xuventude_lugo. As e os menores de 18 anos precisarán permiso dos
pais, nais ou titores/as.
As
imaxes deberán realizarse durante a celebración das distintas
actividades que compoñen a programación de dito aniversario. Cada
persoa participante deberá subir ao Instagram unha única fotografía
co cancelo #XuventudeActiva. Deberase mencionar no título a
@xuventude_lugo.
O
xurado cualificador estará composto por profesionais do sector da
fotografía que premiarán a creatividade, a orixinalidade e a
calidade fotográfica. A selección das fotografías gañadoras será
decisión absoluta do xurado e o seu veredicto, definitivo.
Establécese
un único premio dunha fin de semana para dúas persoas nas Cabanas
da Chousa, no Veral (Lugo).