O director de Solucións Tecnolóxicas Sectoriais da AMTEGA, Carlos Vázquez, premiado polo CPEIG
martes, 11 de xuño do 2019
O
Colexio Profesional de Enxeñaría en Informática de Galicia (CPEIG)
desvelou este 11 de xuño a quen vai dirixido este 2019 o premio
Traxectoria Profesional que concede cada ano a entidade e que se
entrega no marco da Noite da Enxeñaría en Informática de Galicia
(cuxa edición número 11 celébrase este día 28 no Hotel Monumento
San Francisco de Santiago). Desta
volta, o premio Traxectoria Profesional irá dar a mans do director
da Área de Solucións Tecnolóxicas Sensoriais da axencia autonómica
AMTEGA, Carlos Vázquez Mariño.
Como
dixemos, o galardón entregarase na dita Noite da Informática, xunto
con outros nove recoñecementos máis, todos eles co nexo común de
distinguir as iniciativas ou persoas destacadas no eido da Enxeñaría
en Informática.
Coa
concesión do premio a Carlos Vázquez Mariño, o CPEIG quere poñer
de manifesto “a relevancia da profesión informática nos máis
altos niveis de decisión” e a figura das enxeñeiras e enxeñeiros
en Informática como “responsábeis da seguridade tecnolóxica nas
distintas administracións públicas, empresas e outras entidades”.
O
homenaxeado
Carlos
Vázquez Mariño (Lugo, 1975) é licenciado con Grao en Informática
pola Universidade da Coruña (UDC), con cualificación de sobresaínte
na súa tesina de licenciatura. Iniciou a súa andaina profesional no
sector privado en 1998, onde centrou a súa actividade no
desenvolvemento de proxectos web, entre os que destaca o inicio da
banca electrónica dunha importante entidade financeira. En 2001
accedeu ao corpo de profesores de Ensinanza Secundaria na
especialidade de Informática, e desde ese ano até 2009 impartiu
docencia en ciclos de Formación Profesional da familia da
informática en centros de Lugo, Monterroso e Ferrol.
Desde
2009, centrou o seu labor na dirección e xestión, primeiro como
subdirector xeral de Sistemas de Información da Consellería de
Educación e Ordenación Universitaria entre 2009 e 2012, e desde
2012 como director de Área de Solucións Tecnolóxicas Sectoriais da
Axencia para a Modernización Tecnolóxica de Galicia (AMTEGA).
Como
director da Área de Solucións Tecnolóxicas Sectoriais da AMTEGA,
Carlos Vázquez Mariño é un dos responsábeis dos proxectos de
transformación tecnolóxica nos ámbitos de educación, servizos
sociais, emprego, medio ambiente, transporte, infraestrutura e
vivenda, agrogandeiro, forestal e do mar. Nestes ámbitos liderou
proxectos de transformación como o Proxecto Abalar en educación, o
Plan Trabe e a Historia Social Única Electrónica en servizos
sociais, o Plan e-Mobility en transporte, e o Programa Primare nos
sectores primarios, ou proxectos de Compra Pública de Innovación,
como o de Inspeccións Intelixentes Avanzadas no ámbito de control
da PAC.
Fóra
do ámbito profesional, Carlos Vázquez Mariño é Cargo Oficial
Nacional coas titulacións de director de competición, comisario
deportivo, comisario técnico e cronometrador do Comité Técnico de
Cargos Oficiais da Real Federación Motociclista Española.