O eido da viticultura poderá beneficiarse das vantaxes dunha plataforma que mellora a xestión do viñedo

Seresco, compañía especializada en solucións tecnolóxicas e servizos TIC, vén de lanzar unha plataforma tecnolóxica pioneira de viticultura de precisión para unha mellor xestión do viñedo e o aseguramento da calidade da uva. Trátase da plataforma tecnolóxica Cultiva Decisiones, un desenvolvemento que segundo afirma a compañía con sedes Asturias e Vigo, achega de xeito visual e en tempo real predicións, conclusións e recomendacións do viñedo para acadar dende a orixe unha meirande calidade no proceso de produción. A compañía levou a cabo con éxito unha primeira proba xunto coa adega galega Terras Gauda, que lle permitiu dotarse de máis capacidade e efectividade nas predicións e na redución dos seus custos.
Cómpre sinalar que até o de agora, a tecnoloxía neste sector centrouse en optimizar o proceso na adega. Co lanzamento desta plataforma, introdúcese unha tecnoloxía que permite actuar xa no coidado da uva. Grazas a ela, os usuarios acceden a todos os datos sobre condicións climatolóxicas e do terreo en tempo real e mesmo poden recibir recomendacións mediante un sistema de intelixencia artificial, co fin de facer máis doada a toma de decisións perante aspectos claves como a fertilización, o rego, o control de pragas, o intre máis axeitado para a recollida da uva... Amais, o dispositivo permite aos viticultores facer fronte ao principal risco que hai actualmente para o modelo produtivo do sector: o cambio climático.
Seresco inicia de maneira oficial o proceso de comercialización da plataforma no mercado. Os principais destinatarios e usuarios desta nova plataforma serán os asesores expertos –fundamentalmente enólogos de campo–, as propias firmas bodegueiras, centros tecnolóxicos e investigadores, así como colaboradores tecnolóxicos –desenvolvedores de aplicacións, enxeñeiros, fabricantes de sensores, etc–.
A plataforma actúa como un verdadeiro hub de información, xa que achega un auténtico cadro de mando, sinxelo de empregar e interoperábel na nube, capaz de combinar múltiples fontes de datos, tanto públicas como privadas (de balde ou de pagamento), necesarias para unha mellor toma de decisións de cara a asegurar a calidade da uva dende a orixe. En concreto, interrelaciona información espacial obtida de sensores, teledetección e os sistemas de información europeos, como Copernicus (Programa de Vixilancia Medioambiental da Axencia Espacial Europea) ou Inspire (Infraestrutura de Información Espacial en Europa para Apoiar as Políticas Comunitarias de Medio Ambiente).
Por último, subliñar que unha das súas principais características é o seu modelo colaborativo. A plataforma permite engadir novas aplicacións e servizos de terceiros a través dunha tenda en liña cuxa operatividade se realiza totalmente integrada na plataforma.