O empuxe innovador da viguesa Cover Fit imponse no programa de bolsas de APD
luns, 24 de xuño do 2019
A
Asociación para o Progreso da
Dirección, APD, vén de facer entrega de 20 bolsas ás startups
gañadoras da primeira edición do seu programa de apoio ao
emprendemento e á innovación. O certame de Becas APD púxose a
disposición das máis de 3.500 empresas socias, que tiveron ocasión
de presentar os seus candidatos. Entre os mellores proxectos elixidos
salientou a viguesa Cover Fit,
centrada en ecommerce de accesorios deportivos, que se
proclamou vencedora desa primeira convocatoria. Os motivos? O seu
carácter innovador e o seu “excepcional modelo de negocio”.
En
virtude deste recoñecemento, a empresa poderá acceder de balde,
durante un ano, a toda a formación, intercambio e networking
que ofrece APD, amais de integrarse en cada unha das máis de 700
actividades que a asociación celebra anualmente.
Segundo
informa APD, coa primeira convocatoria desta bolsa quíxose achegar
aos proxectos emerxentes e aos emprendedores a expertos e líderes
empresariais, aproximándoos tamén ás ferramentas que precisan para
“facer medrar o seu universo de relacións e a formación dos seus
recursos humanos”.
A
startups gañadoras desta edición de estrea, entre as que se
inclúe Cover Fit, salientan en diferentes eidos tecnolóxicos, como
os mercados online orixinais ou a posta en xogo de chatbots
para a mellora de servizos. Así mesmo, destacaron na introdución da
Intelixencia Artificial e a Aprendizaxe Máquina (Machine Larning)
aplicadas a procesos para empresas e a xestión do coñecemento.