O enxeñeiro Andrés Comerma será o protagonista do Día da Ciencia 2020
mércores, 12 de febreiro do 2020
O
enxeñeiro e arquitecto naval, farmacéutico, escritor e divulgador
Andrés
Comerma y Batalla, será o homenaxeado este ano no Día da
Ciencia en Galicia, a celebración promovida pola Real
Academia Galega de Ciencias (RAGC) para reivindicar a importancia
da investigación a través das súas figuras máis destacadas e,
segundo indica a entidade, “descoñecidas para o gran público na
maioría dos casos”. A RAGC destaca o “caracter polifacético e
visionario deste intelectual”, que foi quen de introducir unha
manchea de innovacións tecnolóxicas na nosa terra, entre as que se
contan a telefonía ou os raios X. Comerna foi elixido polo pleno da
academia de xeito unánime.
O
acto académico de homenaxe terá lugar o 8 de outubro, pero a RAGC
iniciará de inmediato os contactos con todas as institucións
científicas vinculadas a Comerma e aos seus eidos de coñecemento
para organizar nos vindeiros meses actividades de difusión sobre a
súa figura.
Pioneiro
da enxeñería naval
Andrés
Avelino Comerma y Batalla naceu en 1842 na localidade de Valls
(Tarragona), aínda que desenvolveu toda a súa carreira en Galicia
desde que aos 21 anos se fixera cunha praza na Escola de Enxeñeiros
da Armada de Ferrol. Tres anos despois foi nomeado profesor de Física
e Xeometría da Maestranza e enxeñeiro auxiliar do estaleiro de
Ferrol. Durante esta primeira etapa en Galicia, licenciouse en
Farmacia pola Universidade de Santiago e exerceu como correspondente
do xornal La Renaixença, publicación ligada ao movemento
catalanista.
Recoñecido
na comunidade científica como “unha das figuras máis relevantes
da tecnoloxía naval española dos últimos séculos”, Comerma foi
o autor do proxecto e director da construción da obra máis
importante realizada en Galicia en todo o século XIX: o Dique da
Campá no Arsenal de Ferrol, tamén coñecido como Dique de San
Julián, que polas súas dimensións se converteu nun dos máis
grandes do mundo na súa época.
Logo
da inauguración do dique, que hoxe segue a pleno rendemento, foi
nomeado xefe do estaleiro, un cargo desde o que dirixiu a construción
de embarcacións moi diversas, desde fragatas acoirazadas ata
cruceiros. Pero tamén se involucrou na dirección doutro tipo de
obras, coma os xardíns das Angustias e o Hospital da Mariña en
Ferrol.
Uns
anos máis tarde, presentou o seu proxecto máis ambicioso: a unión
de Europa e África mediante a construción dun túnel submarino
baixo o estreito de Xibraltar. A súa proposta, de 19 km. de
lonxitude e máis de 800 metros de profundidade nalgúns tramos,
atopouse coa oposición de Gran Bretaña e quedou sobre o papel como
un proxecto visionario de gran calidade técnica.
Apaixonado
pola innovación tecnolóxica
A
RAGC lembra que Comerma introduciu numerosas innovacións
tecnolóxicas en Galicia, inspirado polas súas viaxes e intereses
diversos. “A el”, explica a academia, “debeuse a instalación
da primeira liña telefónica de Galicia, que no ano 1878 comunicou a
Capitanía e o Arsenal de Ferrol, ao que cómpre engadir as primeiras
experiencias en Galicia con raios X”. A electricidade foi outra das
súas paixóns, ata o punto de participar en 1881 en París na
elaboración do Código das unidades eléctricas xunto con
científicos de primeira categoría como Siemens e Thompson. Os seus
estudos sobre a electricidade valéronlle posteriormente a concesión
da Lexión de Honra francesa.
Sobre
estes e outros avances tecnolóxicos do seu tempo, como o
cinematógrafo ou o fonógrafo, realizou investigacións e publicou
numerosos textos divulgativos. Comerma coñecía oito linguas
(galego, catalán, castelán, portugués, francés, inglés, aleman e
italiano) e ademais foi o introdutor do esperanto en Galicia.