O fundador de FTX pode ser condenado a até 110 anos de cadea

Pese a ser destacado mediaticamente, Sam Bankman-Fried vén de ser declarado culpable de delitos que suman un máximo de 110 anos de cadea

Unha das principais plataformas de intercambio de criptomoedas a nivel mundial, FTX, declarouse en bancarrota hai preto dun ano, e aínda que inicialmente parecía que a compañía podía ser rescatada, apareceron evidencias de fraude que levaron a que máis de 8 mil millóns de dólares dos clientes de FTX se desen por perdidos.
Aínda que non estaba moi claro se a caída de FTX era consecuencia dunha mala xestión (entre outras cousas, aseguraban que un hackeo fixera desaparecer 600 millóns de dólares dos seus fondos) ou dunha fraude, a causa chegou rapidamente aos tribunais, co máximo responsable da empresa, Sam Bankman-Fried, como principal acusado, de xeito que quen estaba considerado como un posible novo Warren Buffett, e elevado polos medios por ter superado os mil millóns de dólares aos 30 anos de idade, remata enfrontándose a unha posible condena de até 110 anos de cadea.
O xuízo contra Bankman-Fried tivo lugar durante o mes de outubro, desvelándose a través de distintos testemuños que fixera un manexo irregular dos fondos de FTX de xeito plenamente consciente, pese a asegurar reiteradamente que non tiña malas intencións co seu proceder e que simplemente asumiu grandes riscos, desculpa que non convenceu ao xurado, que tras máis de 4 horas de deliberación declarou culpable ao emprendedor de 31 anos de todos os cargos que se lle imputaban.
A sentencia non será fixada até o ano que vén, pero está previsto que Sam Bankman-Fried teña que pasar varias década en prisión por «perpetrar unha das maiores fraudes financeiras na historia dos EE.UU.» en palabras do fiscal Damian Williams, quen asegura que aínda que a industria das criptomoedas sexa nova, estamos ante a mesma corrupción de sempre, con mentiras, enganos e roubos.