O galego Javier Franco, recoñecido pola CRUE polo seu labor a prol das TIC
luns, 24 de novembro do 2014
Javier Franco Tubío, director
da Área TIC da Universidade de Santiago de Compostela entre os anos
2002 e 2010, vén
de ver recoñecidas pola entidade académica CRUE as súas
importantes achegas durante a devandita etapa na USC. A
distinción insírese na primeira convocatoria dos galardóns que pon
en marcha a CRUE (Conferencia de Reitores das Universidades
Españolas) para visualizar os esforzos en materia tecnolóxica
(divulgación, normalización, afianzamento, alfabetización, etc).
Estamos a falar dos premios CRUE-TIC.
Segundo informa a
Universidade de Santiago, a CRUE instaurou estes recoñecementos co
obxectivo de salientar a dedicación de entidades colaboradoras e a
traxectoria profesional dos membros asociados á súa rede. Deste
xeito, a primeira edición sáldase cun premio para RedIris (na
modalidade de entidades colaboradoras) e para Javier Franco, que foi
o primeiro secretario executivo da Comisión Sectorial CRUE-TIC.
Segundo engade a Universidade de Santiago, na etapa en que Franco
estivo á fronte do departamento TIC da USC, “consolidouse a
transformación nun proxecto integral desa área, integrando por
primeira vez a responsabilidade de todos os servizos relacionados, e
leváronse adiante dous plans estratéxicos de TIC para a institución
(2004-2007 e 2007-2010)”. Ademais, engade, “afianzouse a presenza
da USC na coordinación de proxectos no eido estatal a través de
CRUE-TIC e no europeo a través de EUNIS, participando activamente
noutras institucións de referencia universitarias como RedIRIS,
precisamente a premiada este ano na categoría institucional”.
Lembrar que Franco é enxeñeiro superior de Telecomunicacións pola
Universidade Politécnica de Madrid. Foi enxeñeiro do Ano en Galicia
no ano 2000 e director xeral de Organización e Sistemas Informáticos
da Xunta de Galicia, así como vicepresidente da Asociación de
Enxeñeiros de Telecomunicación de Galicia (AETG).