O galego José Garay impulsa a web que monetiza os resultados electorais de EE UU: Guesser.com
xoves, 22 de outubro do 2020
A
que sería a primeira plataforma internacional centrada no ámbito da
análise e a predición política, a plataforma Guesser, ten na súa
orixe un importante compoñente da nosa terra. O servizo, que
salienta estes días por empregar algoritmos para achegar as
probabilidades que os candidatos ás eleccións predicións de
Estados Unidos teñen de gañar, foi creada polo galego José Garay,
quen á fronte da súa experiencia coa startup Guesser xa
conseguiu importantes froitos, como o feito de ter logrado, co seu
traballo de cobertura nas eleccións de EEUU, a adhesión de Michael
Cohen, ex avogado e ex voceiro do presidente Donald Trump durante
máis de dúas décadas.
Ademais,
a startup, envorcada neste
ambiente pre-electoral en mostrar os prezos de cada candidato e
partido nos principais mercados de apostas (á vez que constrúe un
modelo de predición propio para vender a diversas entidades)
conseguiu a primeira entrevista en exclusiva de Cohen en Europa, na
que dá a súa opinión sobre que esperar das eleccións, as secuelas
da COVID-19 e o ambiente de protestas civís que prepara o presidente
en caso de non ser reelixido.
Segundo
nos conta o galego José Garay, Guesser é a primeira startup
tecnolóxica no mundo que “se dedica a monetizar o impacto duns
resultados políticos”, mostrando as ligazóns entre economía e
política e contribuíndo a converter os resultados electorais “nun
activo líquido máis como poden ser as accións, os bonos ou as
criptomoedas”.
Os
produtos da empresa inclúen Guesser.com,
unha web de acceso global onde investidores e apostantes poden atopar
os últimos prezos establecidos nos mercados políticos, así como
datos de enquisas e análises dos expertos. Para casas de apostas e
outras entidades financeiras, como os fondos de investimento, Guesser
tamén desenvolve un servizo privado que inclúe un modelo de
predición propio, cotas actualizadas e resultados en directo o día
das eleccións, de maneira que “estes poidan trasladar esta
información aos seus mercados e sacarlle o maior rédito posíbel”,
explica o impulsor da startup, engadindo que “a nosa
intención é construír o futuro dos mercados de apostas políticas”
e que “na intersección entre a política e as finanzas hai un
enorme potencial sen monetizarse a día de hoxe, como demostra o
feito de que o día posterior ao anuncio do Brexit, a libra chegase a
caer un 10% nunha mañá”.
Respecto
ao modelo de predición que a empresa constrúe xunto con provedores
de datos específicos de cada país, este agrega información sobre
diferentes parámetros que afectan á política dunha determinada
área xeográfica. Sobre estes datos, Guesser constrúe o seu modelo
de probabilidade de seu, é dicir, unha serie de algoritmos que
permiten modelar a información e repetir simulacións dos resultados
dunhas eleccións millóns de veces, de onde se extraen as
probabilidades de gañar de cada partido ou candidato.
A
startup traballa a día de hoxe para as eleccións de Estados
Unidos, o vindeiro 3 de novembro, e xa conta con algunha gran casa de
apostas británica (William Hill ou Betfred) como partner, así
como con dúas grandes entidades financeiras como clientes no mesmo
país. De entre os moitos datos xerados que está a xerar a
plataforma, unha das grandes conclusións refírese directamente ao
resultado do proceso: Donald Trump ten poucas probabilidades de ser
reelixido, segundo Guesser.