O investigador Pablo Campo constata os beneficios para os nosos maiores do exercicio con realidade virtual
venres, 9 de xuño do 2023
Facer
exercicio con Realidade Virtual ten beneficios para a saúde e a
calidade de vida das persoas maiores. Así
o vén de demostrar o investigador Pablo Campo (UVigo) nun dos
estudos que conforman a súa tese de doutoramento. Os resultados
desta investigación recóllense nun artigo publicado na revista
científica Journal of clinical medicine e constitúen, “ata
onde chega o noso coñecemento, o primeiro estudo con Realidade
virtual Inmersiva nesta poboación a nivel internacional”, recoñece
o integrante do grupo HealthyFit, que forma parte do Instituto de
Investigación Sanitaria Galicia Sur (IISGS).
Segundo
reflicte fontes da Universidade de Vigo, estes resultados son á súa
vez unha das consecuencias do traballo que, no marco da tese de Pablo
Campo, levou a cabo con 24 usuarios e usuarias do centro Saraiva
Sénior, en Pontevedra, no que buscaba coñecer os beneficios físicos
e cognitivos dun programa de exercicio físico baseado no uso destas
tecnoloxías. Este estudo, explica, permitiu rexistrar “melloras
significativas” no equilibrio, na marcha e na diminución do risco
de sufrir caídas das e os maiores que realizaron un programa de
actividade física cun dispositivo de realidade virtual.
Dirixida
polo catedrático da Facultade de Ciencias da Educación e do Deporte
e coordinador do grupo HealthyFit, José María Cancela, e polo
profesor da Facultade de Fisioterapia Gustavo Rodríguez Fuentes, a
tese Deseño e implementación de un programa de ejercicio físico
con realidad virtual inmersiva para la mejora de capacidades
funcionales en las personas mayores recolle os resultados dunha
investigación baseada no uso dos chamados exergames,
videoxogos que implican un movemento físico.
O
estudo centrouse en avaliar os efectos dun programa de exercicio de
dez semanas, cunhas lentes head-mounted-display e un xogo
cunha “temática baseada no boxeo”, que engadía ao exercicio
físico “unha compoñente cognitiva”, que permitía traballar “a
atención, a velocidade mental ou a toma rápida de decisións”,
explica. Durante este período, as e os participantes no estudo
mantiveron “as actividades habituais do centro”, mais nun dos
casos, o do grupo experimental, a estas sumábanse tres sesións
semanais de seis minutos con este dispositivo.
A
investigación permitiu constatar como o grupo que traballou con
Realidade Virtual presentaba “melloras significativas” nos
indicadores relativos a equilibrio e marcha, á vez que diminuía o
seu risco de sufrir caídas. Tamén se rexistrou unha mellora
significativa, de 4,8 puntos, no test que avalía a chamada “forza
de prensión”, nos membros superiores, un indicador que, como
lembra Campo, acúa como “marcador de fraxilidade nas persoas
maiores”. Fóra dos aspectos físicos, tamén se constataron
melloras nos valores que avalían a súa calidade de vida, á vez que
as e os participantes no estudo mostraron tamén unha “gran
satisfacción” cunha experiencia que se mostrou, como “100%
segura” nesta poboación.