O lado científico da Internet, a debate esta semana no Campus de Ferrol
mércores, 13 de marzo do 2019
Podemos
saber, até certo punto, o que significa Internet nas nosas vidas na
actualidade, pero albiscar o futuro da nosa relación coa Rede pode
ser unha tarefa complexa. Sobre todo, polo ritmo de vertixe que
adoptaron dende hai tempo os cambios tecnolóxicos, o que dá como
resultado evolucións difíciles de predicir. Porén, os
investigadores queren botar luz sobre estes cambios, e esta semana,
dende mañá e até o venres 15, van xuntar forzas no Campus de
Ferrol (salón de actos) para facelo. Estamos a falar das Xornadas
de Filosofía da Ciencia da Universidade da Coruña, que van xa
pola súa 24 edición.
O
encontro terá un programa de actividades moi salientábel, que
inclúe a presenza do director do Institute for Data Exploration and
Applications e Tetherless World Professor of Computer, WEB and
Cognitive Sciences no Rensselaer Polytechnic Institut de Nueva York,
James Hendler, que será o responsábel da conferencia inaugural,
baixo o epígrafe O futuro da web.
Volvendo
á cerna das xornadas, serán novamente unha oportunidade referencial
para reflexionar sobre a vertente científica de Internet, que,
segundo indica a organización das mesmas (a UDC a través do Centro
de Investigación de Filosofía da Ciencia e a Tecnoloxía e co apoio
da Sociedad de Lógica, Metodología y Filosofía de la Ciencia en
España). pasa “desapercibida fronte á insistencia na base
tecnolóxica e as prácticas e usos sociais de Internet”.
Previamente
a intervención de Hendler, o reitor da UDC, Julio Abalde, inaugurará
os encontros xunto co coordinador dos mesmos, Wenceslao J. González,
nun acto que será o día 14 ás 9:45 horas. Nesta ocasión, a
temática xirará arredor de Internet e ciencia: análise desde a
complexidade estrutural e dinámica.
A continuación da
intervención de Hendler sobre o futuro da Sociedade da Información,
falará o profesor da University of Massachusetts Lowell Yan Loo
sobre o deseño de internet de máquinas e humanos para o futuro.
Amais
de Hendler e Loo, participan nas xornadas os seguintes expertos:
Thanassis Tiropanis (Universidade de Southampton), Ole Henseth
(Universidade de Oslo), Ruth Towse (Universidade de Bournemouth) e
Enrique Alonso (Universidade Autónoma de Madrid).
Tamén
haberá comunicacións. Están previstas as correspondentes a Stephan
Guttinger (London School of Economics), María José Arrojo
(Universidade da Coruña), e Javier Taravilla (Universidade Autónoma
de Madrid).
Segundo salienta a organización das xornadas,
estas traerán a Ferrol a relatores do máximo nivel de universidades
de Estados Unidos, Reino Unido, Tailandia, Noruega e España. A UDC
tamén salienta, no programa previsto de relatorios, intervencións
sobre temas como a complexidade na construción de Internet, as
tendencias na relación entre ciencia e Rede, observatorios de datos,
plusvalía dixital ou a necesidade dun novo enfoque económica para a
economía creativa na era dixital.