O magnetismo será o fío condutor dos quintos Premios Youtubeiras
mércores, 15 de setembro do 2021
Os
Premios Youtubeiras, organizados polos servizos de normalización
lingüística de dez concellos (Baña, Ames, O Grove, Moaña,
Ourense, Pontevedra, Ribadeo, Rianxo, Santiago e Teo), das tres
universidades galegas e da Deputación da Coruña, presentaron
este mércores 15 de setembro a súa quinta edición, organizada
baixo o lema Magnetismo en liña. Foi nun acto celebrado
en Santiago de Compostela e no que se destacou “a necesidade de
impulsar a formación e consolidar a comunidade creadora que xurdiu
ao redor desta iniciativa”. Na presentación estivo Carme Pereiro,
coordinadora do Proxecto Youtubeiras, quen anunciou ante os medios os
detalles desta quinta edición na compaña de Rubén Prol,
concelleiro compostelán de Políticas Lingüísticas, e de Escarlata
Pampín, concelleira de Normalización Lingüística e Mocidade de
Ames.
Pereiro
púxolle cifras ao grande incremento de participantes nestes anos ao
sinalar que “en 2017 concorreron 202 vídeos”, mentres que na
convocatoria de 2020 “a cifra ascendeu ata os 536”. Nesta nova
convocatoria, engadiu, “tense a vontade de superar a marca, malia
que o prazo de inscrición para participar é menor que o de edicións
anteriores, xa que se limitará a dous meses, establecéndose o 22
de outubro como data límite para o envío de propostas”.
Co
obxectivo de fomentar a creación de canles, pero “tamén o seu
mantemento”, fixeron saber que “este ano non se poderán
presentar vídeos illados como en anteriores edicións”. Trátase
dunha das grandes novidades dos quintos Premios Youtubeiras que, por
segunda edición consecutiva, artellaranse nunha ducia de categorías:
canle, vídeo, youtubeiro/a, calidade lingüística, impacto,
calidade técnica, comunicación, creatividade, musical, didáctico,
pioneiro e premio do público. Os tres primeiros acompañaranse cunha
dotación económica de 1.000 euros, mentres que os nove restantes
chegarán aos 500 euros. Poderán aspirar a gañar os galardóns
nestas doce categorías todas as persoas creadoras de contidos en
lingua galega maiores de 14 anos con canles de Youtube,
autoproducidas e que teñan polo menos cinco vídeos publicados con
data posterior ao 23 de outubro de 2020.
En
relación á vertente máis formativa do certame, a Carme Pereiro
dixo que nos vindeiros meses ofreceranse novas formacións,
actividades que lle darán continuidade ao obradoiro impartido por
Xoán Escudero ao comezo do verán, centrado na mellora da calidade
sonora dos vídeos. Neste sentido, explicou que este mes Adrián
Suárez impartirá un curso sobre posicionamento na creación dixital
e, xa en outubro, Bárbara Román, avogada especializada en empresas
tecnolóxicas, será a encargada de desenvolver os aspectos legais do
Youtube.
Durante
a presentación desta mañá anunciouse tamén a constitución do
xurado que decidirá quen gaña en todas as categorías, agás no
caso do Premio do Público. Nesta ocasión o tribunal estará
composto polo sociolingüista Fernando Ramallo, responsable da ANL da
UVigo; o xornalista Adrián Lede, a profesora de lingua galega Noemí
García, a realizadora e coordinadora do Carballo Interplay Sonia
Méndez e Esther Estévez, xornalista e responsable do #DígochoEu da
Televisión de Galicia.