O mercado dos smartphones volve medrar

A consultora Counterpoint Research considera que, tras un mal ano 2023, o mercado dos smartphones estaría a recuperar forzas en 2024 cun crecemento do 4%, aínda que destacando o feito de que, mentres os xigantes Samsung e Apple teñen certa estabilidade como líderes do mercado mundial, a chinesa Xiaomi consolídase como a terceira marca mundial e é claramente a que máis medra en número de unidades.
Counterpoint celebra que o mercado dos smartphones volva á senda do crecemento, tras dous anos consecutivos de malos resultados, e destaca o feito de que Samsung consegue manter a súa boa posición á vez que leva todo un ano comercializando móbiles con IA integrada, mentres que a ausencia de Apple Intelligence no lanzamento dos iPhone 16 podería estar a afectar negativamente á compañía da mazá, xa que moitos compradores estarían a adiar a renovación do seu iPhone un ano, para poder recibir efectivamente as novidades prometidas pola compañía de Cupertino.
Outro detalle a salientar é que agora que as vendas se asemellan a antes da COVID-19, a nivel de negocio os resultados son aínda mellores, xa que se mantivo a tendencia cara aos dispositivos premium, polo que o crecemento do 4% en número de vendas se traduciría nun incremento de ingresos do 8% (xa que cada vez os dispositivos teñen un prezo máis elevado, especialmente nas gamas máis altas).