O noso sector do agro xa ten o seu dispor unha nova plataforma de transformación: E-Learning Data

mércores, 25 de xaneiro do 2023 S. P.

Tras meses de preparación e traballo, a plataforma E-Learning Data, xa está ao dispor do sector primario galego e de todos os emprendedores que en Galicia pretendan apostar polo agro e pola agrodixitalización. Trátase dunha ferramenta desenvolvida no marco do proxecto Interreg Poctep Hub Iberia Agrotech (HIBA), do que é socia a iniciativa galega DATAlife Hub de Innovación Dixital que preside Pablo Álvarez Freire.
Segundo explica o Hub, o proxecto é realidade grazas ao traballo cooperativo de varios centros con ampla traxectoria en materia de agrodixitalización e socios beneficiarios desta iniciativa europea como a Escuela Técnica Superior de Ingeniería Agronómica y de Montes (ETSIAM) da Universidade de Córdoba, a Universidade de Évora e a Universidade do Algarve, ademais da colaboración das Cooperativas Agroalimentarias de Andalucía.
A plataforma E-Learning Data, dispoñíbel na web do proxecto HIBA en español e en portugués, nace para “axudar a adquirir competencias en transformación tecnolóxica aplicada á agricultura”. Aberta, previo rexistro, a todas as persoas interesadas en formarse e adaptarse ás novas necesidades do sector agro, a plataforma inclúe cursos online gratis (MOOC) sobre tecnoloxías habilitadoras dixitais no agro adaptados a distintos perfís de usuario, así como acceso a ferramentas innovadoras que favorecen o emprendemento, apoio á capacitación a través de asistentes virtuais e coñecemento sobre os aspectos máis relevantes da agricultura de precisión. Un asistente virtual dispoñíbel as 24 horas, HIBABot, encárgase de resolver calquera dúbida.
A plataforma está destinada a persoas que traballen ou emprendan no sector agroalimentario, en empresas de servizos do sector primario, grupos de desenvolvemento local, asociacións agrícolas, formadores e alumnado tanto universitario como non universitario. Permitirá probar innovacións e experimentar con tecnoloxías para promover o espírito emprendedor, mellorar o adestramento en dixitalización e brindar apoio á hora de tomar decisións.
A iniciativa E-Learning Data quere tamén poñer ao dispor das empresas galegas a experimentación e desenvolvemento de aplicacións que, baseadas en datos procedentes de distintas plataformas de observación (satélites ou drons), melloren as capacidades de innovación do sector agro. Un exemplo é o acceso a produtos Copernicus, especialmente imaxes de Sentinel-2, que, segundo sinalan dende DATAlife Hub, ten múltiples aplicacións para o agro de Galicia. Sentinel-2 é unha misión de observación terrestre desenvolvida pola Axencia Espacial Europea (ESA) dentro do programa Copérnico para rexistrar observacións do planeta Terra e achegar servizos como o seguimento da evolución dos bosques, os cambios na cortiza terrestre e a xestión dos desastres naturais.

PUBLICIDADE