O novo Centro de Datos da Xunta estará na vangarda das administracións estatais en materia de seguridade
venres, 7 de xaneiro do 2022
O
Goberno galego confirmou esta semana que o Centro de Datos que vai
construír no Parque Empresarial de Sionlla será
“o único dunha administración pública española en cumprir coas
maiores esixencias mundiais de seguridade, que certifica o Uptime
Institute coa cualificación Tier-4”. Para quen non o saiba, as
certificacións desta entidade están consideradas o estándar
recoñecido globalmente para a fiabilidade e o desempeño xeral dos
centros de datos. Actualmente hai máis de 2.012 certificacións
emitidas en 109 países, que van dende o primeiro nivel (Tier-1) ata
o máis esixente (Tier-4).
Respecto
dos parámetros que avalían os Tier, estes atenden ao tempo de
dispoñibilidade dun Centro de Procesamento de datos (CPD). A
avaliación refírese sobre todo aos aspectos relacionados co
subministro eléctrico e cos sistemas de refrixeración. “Así, nun
Tier 1”, explican fontes da axencia autonómica AMTEGA, “as
instalación non dispoñen de compoñentes redundantes na
distribución eléctrica e de refrixeración, polo que perderán a
súa capacidade de operación ante un fallo de calquera delas. A
dispoñibilidade, neste caso, é dun 99,671%, e o tempo en que se
mantén inactivo para o mantemento anual é de 28,82 horas”.
No
caso da Certificación Tier-4, que é que terá o novo Data Center da
Sionlla, a cualificación é de Centro de datos tolerante aos
fallos, polo que pode soportar as incidencias de calquera dos
seus compoñentes que inhabiliten o subministro eléctrico ou de
refrixeración. Respecto á dispoñibilidade, é dun 99,995% e o
tempo de indispoñibilidade para o mantemento ao ano é de 52,56
minutos.
Neste
senso, o Goberno galego explica que “o nivel de seguridade da nova
instalación aportará estabilidade na prestación de servizos
públicos críticos, xa que conterá toda a información que se
almacena no CPDI do Gaiás; deste xeito evitará que se poidan
producir caídas que afecten a servizos como a Sanidade ou a
Educación”.
A
axencia que dirixe Mar Pereira tamén lembrou que o proceso de
licitación do novo Data Center foi aprobado polo Consello de
Goberno o pasado 4 de novembro e que esta primeira licitación inclúe
a realización do proxecto, a dirección de obra e a realización de
probas, implicando un investimento estimado de máis de 1,9 millóns
de euros. O orzamento total será de 19,2 millóns de euros,
incluíndo a construción e a compra dos terreos, parte deles con
cargo aos Fondos Europeos Next Generation.
Esta
nova infraestutura “permitirá duplicar as capacidades de
procesamento e almacenamento de datos actuais e estará dimensionada
para xestionar o incremento de novos servizos dixitais”, engadiu o
Executivo autonómico, apuntando que o Data Center “traballará
en sincronía co CPD albergado no Gaiás e reforzará os mecanismos
de seguridade, dispoñibilidade e custodia dos datos de todo os
sector publico autonómico, incluído o SERGAS”. Amais, todos os
sistemas críticos estarán deseñados para poder ser illados e
mantidos sen perda de servizo e contará con acometidas redundantes
de electricidade e comunicacións.
O
novo Data Center terá unha superficie de 10.000 metros
cadrados e albergará tamén unha plataforma loxística conectada cos
centros de provisión para xestionar o equipamento tecnolóxico do
sector público autonómico. O novo edifico disporá de salas para
persoal técnico de administración dos sistemas e infraestruturas do
CPD.
A
Xunta dispón actualmente dun Centro de Proceso de Datos Integral no
Gaiás cunha superficie de 1.275 metros cadrados, que acubilla 2.500
servidores cunha capacidade de almacenamento de 13 petabytes. A súa
posta en marcha en 2012 supuxo un fito tecnolóxico na Comunidade que
permitiu modernizar, racionalizar e homoxeneizar a prestación dos
distintos servizos dixitais ós cidadáns
O
CPDI do Gaiás conta cun CPD de respaldo en San Caetano para permitir
o mantemento de servizos críticos en caso de incidencias. Porén,
engade a axencia AMTEGA, “este CPD de respaldo está ao límite da
súa capacidade para albergar novos sistemas tecnolóxicos, carece de
posibilidades de ampliación e a maioría das súas infraestruturas
eléctricas e de climatización están próximas ao fin da súa vida
útil”.
Está
previsto que a entrega do proxecto de obra se faga no segundo
trimestre de 2022. O seguinte paso sería licitación da obra
prevista para finais do 2022 co obxectivo de que de que se completase
a construción do centro entre 2022 e 2024.