O novo Nokia 105 carece de 4G e USB-C

A recuperación dos deseños de móbiles clásicos da marca Nokia non deixa de sorprender, non sempre para ben, pois para suceder á revisión do Nokia 105 do ano pasado, que incluía conectividade 4G e unha batería de 1.450 mAh, chega un novo Nokia 105 cun deseño menos redondeado, con conectividade 2G e unha batería (agora extraíble) de 1.000 mAh. De feito, este teléfono ten un deseño máis parecido ao dunha batería externa que o dun teléfono, resultando difícil adiviñar cal pode ser o seu público obxectivo.
O novo Nokia 105 presume de deseño retro e resistencia (IP52), incorpora lanterna LED, radio FM e reprodutor de MP3 (conta con conector minijack e lector de tarxetas microSD de até 32 GB), a súa batería extraíble promete unha autonomía de até 14 horas de conversa e 18 días en espera e, como dato máis rechamante, non estaría a carencia de 4G, senón que o seu porto de carga sexa micro-USB, ou sexa, que estamos ante un produto que non pode comercializarse en Europa.