O obradoiro Emprégate 2.0 expón os perigos e vantaxes das redes sociais á hora de procurar emprego
xoves, 31 de outubro do 2013
Remexer
na Rede pode ser unha arma de dous fíos, pois arestora todo o mundo
(ou case) posúe unha xanela na que amosarse, falamos de Facebook,
Twitter... en definitiva: as redes sociais. Pois ben, se es dos que
contas todo o habido e por haber nestes espazos tamén terás que
aceptar que non só os teus achegados poidan velo. Arredor disto
xirou o obradoiro Emprégate
2.0
impartido esta semana pola experta en redes sociais, Guadalupe
Reboredo, quen achegou unha análise polo miúdo sobre que implica
posuír perfís de Facebook ou Twitter de cara a atopar un emprego.
O
destinatario deste obradoiro foi o alumnado do último curso do Grao
en Xestión e Dirección Pública do campus de Pontevedra, ao cal se
tentou concienciar da necesidade de ter un currículo en liña
“debidamente xestionado” e de revisar “con tino todo o que día
a día publicades en Facebook e Twitter, uns contidos que, na maioría
dos casos, non só poden ver os vosos amigos e familiares senón
tamén aquelas empresas que poderían estar interesadas en
contratarvos”. Deste xeito dábanse a coñecer as principais
ferramentas e estratexias da web 2.0, un valor engadido
para aquelas persoas que estean a buscar emprego e opten por
compartir na Internet o seu currículo a través de redes
profesionais ou blogs especializados.
Segundo un informe
elaborado no ano 2012 por Infoempleo, o 49% das empresas en España
empregaron as redes
sociais para recrutar persoal e o 80% delas recoñeceu ter analizado
a reputación en liña do candidato ou candidata durante o proceso de
selección, subliñaba Guadalupe Reboredo. Asemade, no mesmo estudo
recollíanse outros datos significativos como o feito de que “as
persoas activas en redes sociais” teñan máis oportunidades á
hora de seren contratadas e de que o 55% dos responsables de Recursos
Humanos recoñecen ter tomado a decisión final segundo o perfil do
candidato nunha determinada rede social.