O obradoiro de HTML5 organizado polo CiTIUS bate records na inscrición
luns, 11 de marzo do 2013
A versión 5 da linguaxe
HTML, empregada para a creación de páxinas web, centra a máis
recente actividade formativa do centro CiTIUS
da Universidade de Santiago, cuxa segunda sesión celebrouse o pasado
venres 8 de marzo. Segundo informan os responsábeis deste espazo de
investigación, a repercusión e o alcance deste curso-obradoiro foi
inmellorábel. De feito, batéronse records no proceso de
inscrición. Esta segunda sesión da actividade desenvolveuse nas
aulas de informática da ETSE (Escola Técnica Superior de Enxeñaría
da Universidade de Santiago) e veu da man dos investigadores do
CiTIUS Eduardo Sánchez Vila e Alberto Bugarín Diz. Tamén se
contou, en labores de achega de contidos, coa empresa tecnolóxica
TeslaTechnologies,
fundada por titulados en Enxeñaría Informática da Universidade de
Santiago.
O curso, dividido en
cinco sesións intensivas en quenda de tarde, diríxese a estudantes
dos distintos másters ou graos da área TIC. Asemade, superou como
dixemos tódalas previsións dos seus organizadores ao exceder o
número de solicitudes de inscrición a cota das 40 prazas ofertadas.
O obxectivo do obradoiro
foi, informa o CiTIUS “fixar unha serie de conceptos esenciais,
para que os alumnos poidan ter unha base axeitada sobre a que
construír proxectos de maior complexidade”. Algúns destes
conceptos xiran en torno ao acceso e mantemento de datos off-line,
a xestión de información de xeolocalización utilizando o
dispositivo GPS do móbil, a integración de audio e vídeo, a
creación de animacións básicas 2D, ou o desenvolvemento de
elementos HTML5 con JavaScript e CSS3.