O pico do tráfico de datos de Movistar durante a borrasca superou ao de Aninovo
xoves, 14 de xaneiro do 2021
Os
embates da borrasca Filomena foron máis que considerábeis en boa
parte do territorio estatal e, por este motivo, a operadora
Telefónica puxo en marcha un plan de emerxencias para asegurar a
adecuada prestación do servizo durante o temporal, plan
do que vén de facer completo balance, como tamén da actividade
xerada a través do servizo móbil, que bateu récords en tráfico de
datos.
En
concreto, Telefónica activou as seis bases de emerxencia das que
dispón a compañía para afrontar imprevistos desta índole,
situadas en Madrid, Barcelona, Zaragoza, Valencia, Sevilla e León.
Segundo informou a operadora, as unidades están compostas por
equipos humanos de intervención “especificamente preparados”,
ademais dunha frota de vehículos todo-terreo, motoneves, máquinas
pisaneves e vehículos Unimog que permiten, en palabras de
Telefónica, “acceder a lugares de moi difícil acceso para
asegurar o mantemento do servizo”.
En
paralelo, antes do temporal, Telefónica desprazou e instalou grupos
electróxenos de reforzo en determinados puntos críticos para
prestar servizo en caso de fallo de subministración eléctrica. A
maiores, ampliou os recursos humanos que controlan a rede 24x7 tanto
nos centros de control remoto como a pé de rúa cun total de máis
de 400 técnicos.
O
temporal de neve Filomena deixouse sentir tamén na rede de Movistar
onde os valores máis destacados producíronse nos datos móbiles UL
(Up Link-do usuario á rede) que experimentaron un medre do 13% con
respecto aos niveis dos días anteriores (en condicións normais o
tráfico UL supón só un 7% de media). No entanto, o temporal
produciu que os usuarios enviasen vídeos e imaxes desde o móbil a
outras persoas, ademais de establecer vídeo-conferencias o que
explica o incremento do tráfico en sentido UL. Este mesmo incremento
foi máis acusado nas comunidades máis afectadas o temporal, como
Madrid, onde o pico do tráfico enviado desde os móbiles dos
clientes Movistar superou mesmo ao máximo de Ano Novo.
Doutra
banda a voz móbil de Movistar mantivo o comportamento rexistrado
desde hai uns meses cun repunte no seu uso e o día da nevada (sábado
9 de xaneiro) experimentou un incremento do 13% respecto ao tráfico
habitual en días non laborábeis.