O planetario da coruñesa Casa das Ciencias renova o seu proxector

martes, 12 de setembro do 2023 S. P.

O planetario da Casa das Ciencias da Coruña vén de anunciar que dende este luns, 11 de setembro, e até dentro de 3 semanas aproximadamente permanecerá pechado por mor da renovación do seu sistema de proxección dixital logo de facerse cun modelo de última xeración que, segundo informou o Concello, “aproveitará a mellora na potencia dos computadores e as tecnoloxías de proxección para achegar unha experiencia inmersiva de calidade moi superior á do mecanismo actual”.
Deste xeito, o Goberno de Inés Rey investiu 214.000 euros na substitución dun equipo que este ano cumpre 14 anos dende a súa instalación. Engadir que o resto do museo pódese visitar con normalidade todos os días en horario de 10 a 19 horas.
Indo ao novo sistema, sinalar que contará con proxectores de tecnoloxía LED e o software Digistar 7, desenvolvido pola empresa Evans&Sutherland, o que proporcionará unha experiencia con maior resolución e imaxes máis reais para trasladar aos usuarios e usuarias a outros planetas ou viaxar pola Vía Láctea e o resto do universo.
Fontes do Concello engadiron que a renovación deste dispositivo do planetario non supón perder o emblemático proxector analóxico de estrelas Zeiss, que convivirá co novo sistema e complementarao nalgunhas sesións.
A xeito de curiosidade dicir que os primeiros en estrear o renovado planetario serán o alumnado escolar do curso 2023/24, un público que o curso anterior superou a cifra de 30.000 persoas.

PUBLICIDADE