O portal Twin Shoes preséntase en Compostela nunha festa con máis de 200 asistentes
xoves, 20 de outubro do 2011
Tal e como anunciamos os días
pasados, Santiago íase converter esta semana na palestra para dar a coñecer,
a nivel xeral e onde está a xente, un dos proxectos galardoados na pasada edición
dos Premios INNOVA-G de AGESTIC. Falamos de Twin
Shoes, portal galego para a busca de amizade e parella estable que se deu a
coñecer finalmente no Bar Deluxe de Compostela, nunha multitudinaria festa
desenvolvida baixo un lema que fala por si só, da festa e máis da web: Enlázate al amor. A web, que xorde coa
intención de axudar ás persoas ceibes a atopar compañeiro/a, vén da man de
Itziar Villar, promotora e directora dun proxecto, Twin Shoes, que precisou “de máis de dous anos de duro traballo e
esforzo”.
Así o fixo saber no
transcurso da presentación da iniciativa, perante máis de dous centenares de
asistentes, aos que puxo ao tanto, tamén, das principais novidades que pon en
xogo este portal, “o primeiro dos creados
en España integramente con capital galego”. Ao seu xuízo, a web é unha nova
opción de crear oportunidades para atopar “o
zapato xemelgo co que compartir o camiño da vida”.
Entre outras cousas,
explicou que Twin Shoes inclúe un test de afinidade personalizábel, baseado en
valores en proxectos vitais, que ten o obxectivo de axudar a crearmos, na web,
a nosa propia porcentaxe de afinidade. Isto vén a conto porque estes gustos e
tendencias en común son puntos clave para lograr que unha parella se manteña no
tempo, de xeito feliz e enriquecedor, subliñou Itziar. “Grazas a esta porcentaxe, o buscador recomendará o perfil máis
compatible para o usuario, aumentando deste xeito a probabilidade de éxito;
ademais, os usuarios premium terán ao seu alcance a plataforma de atención ao
cliente dirixida por psicólogos e máis un servizo de organización de citas”,
engadiu. Twin Shoes, con toda a súa feitura innovadora, non é un proxecto novo.
De feito, xa operaba a nivel blog, a través de blog.twinshoes.es
e dende o mes de febreiro, tempo no que xa acadou a cifra nada desprezábel de
10.000 visitas de case 60 países.