O prazo de inscrición de Nos tamén creamos! (Política Lingüística) estará aberto até o 29 de setembro

Co inicio de curso vai quecendo motores o programa Nós tamén creamos!, impulsado pola Secretaría Xeral de Política Lingüística co obxectivo de “incrementar o uso do galego entre as xeracións máis novas” e “fomentar a presenza do galego nos centros de educación Infantil e Primaria a través da creatividade e da incorporación das TIC nas aulas, máis en concreto, mediante a creación de curtametraxes en galego cos técnica de stop motion”.
O premio inclúe unha dotación de libros infantís en galego para cada centro seleccionado, así como formación e asesoramento ao profesorado para que poida realizar cos estudantes curtametraxes de animación coa técnica de stop motion baseadas nos libros proporcionados.
No curso 2013-2014, o programa foi incluído no Plan Proxecta e ampliou a formación docente, que pasou a ser anual, con parte presencial e parte en rede, para os centros admitidos.
Desde o ano lectivo 2011-2012, a SXPL convoca anualmente o concurso Nós tamén creamos!, asociado ao programa, para centros de titularidade pública. Establece tres categorías: Educación Infantil, 1º e 2º de Primaria e 3º e 4º de Primaria.
Nós tamén creamos! desenvólvese en colaboración coa Compañía de RTVG e OQO Editora. As curtas premiadas publícanse no web da SXPL e no da CRTVG.
Grazas á colaboración coa CRTVG, estas curtas de animación poden verse na aplicación Xabarín desta entidade e na sección infantil da súa canle, o que, segundo informa a Secretaría Xeral, fai que medre “o efecto positivo na promoción da lingua galega, que non se restrinxe ao ámbito de cada centro senón que chega a un público moito máis amplo, mesmo de fóra da Comunidade Autónoma”. Por outra parte, o centro gañador na modalidade de 3º e 4º cursos de primaria ten a posibilidade de participar no Festival de Cans.
No curso 2022-2023 acordouse conceder no sucesivo un accésit, de ser o caso, para cada categoría e, no 2023-204, ampliarase o número de categorías cunha cuarta, para 5º e 6 de primaria.
O prazo de inscrición no programa remata o 29 de setembro e pódese facer a través do Portal de Educación.