O presidente da Deputación da Coruña visitou o coworking dixital da Cámara de Santiago

venres, 14 de maio do 2021 S. P.

O presidente da Deputación de A Coruña, Valentín González, visitou este 12 de maio, acompañado do alcalde de Santiago, Xosé Sánchez Bugallo, o novo espazo de coworking dixital que a Cámara de Comercio de Santiago habilitou nas instalacións da entidade, no polígono de Costa Vella, e que vén de ser premiado de novo por Funcas e a Universidade Rey Juan Carlos como o mellor viveiro de España para a creación de empresas.
Foron recibidos polos vicepresidentes da Cámara, José Carballo e Jorge Lorenzo, que debullaron “a intensa actividade que realizan desde a Cámara, que aglutina a numerosas empresas na áreas de Compostela e Barbanza, ás que inxecta fondos europeos que permiten levar a cabo políticas importantes como pode ser a dixitalización”, sinalaron.
Ademais, dados os esforzos que está a levar a cabo a Deputación para estender innovadores xeitos de traballar e emprender en colaboración cos concellos, o vicepresidente da Cámara presentou o proxecto de espazo de traballo colaborativo dixital para estudar a posibilidade de traballar xuntos fomentando sinerxías que melloren o tecido empresarial, dean oportunidades a emprendedores e faciliten a súa dixitalización. Neste sentido González Formoso salientou que “Galicia necesita deste tipo de colaboracións entre institucións e empresas, o que redundará nun beneficio da propia demarcación da Cámara e da provincia da Coruña” e, pola súa parte, José Carballo valorou a visita e destacou que “falamos a mesma linguaxe e ímonos entender para ser de utilidade ás empresas da demarcación”.

PUBLICIDADE